Kona stöðvuð af samborgurum sínum

Kona var handtekin eftir að hafa ekið utan í bifreiðar og rafmagnskassa í Reykjavík, og stöðvuð af samborgurum sínum. Var málið afgreitt á lögreglustöð og konan látin laus að lokinni sýnatöku. 

Þetta kemur fram í tilkynningu frá lögreglunni á höfuðborgarsvæðinu. Frá því klukkan 11 í morgun hefur embættið sinnt 47 málum. Töluvert hefur verið um vandræði í umferðinni. 

Hljóp undan laganna vörðum

Lögregla stöðvaði akstur bifreiðar eftir eftirför úr Vogahverfi upp í Höfðahverfi. „Ökumaður hljóp undan laganna vörðum en náðist eftir stutta stund." Málið var svo afgreitt á lögreglustöð með sýnatöku og skýrslutöku. 

Tilkynnt var um innbrot og þjófnað í fyrirtæki í Mjóddinni, einhverjar vísbendingar liggja fyrir og er málið í rannsókn. 

Í hádeginu var ökumaður stöðvaður þar sem hann ók um í Höfðahverfi, en hann er grunaður um vímuakstur. Var hann handtekinn en látinn laus að sýnatöku og skýrslugjöf lokinni. 

• Blogga um frétt