Eldur kviknaði í herbergi á Grund

Eldur braust út í herbergi á fjórðu hæð á hjúkrunarheimilinu Grund við Hringbraut í Vesturbæ Reykjavíkur á fimmta tímanum í dag.

Slökkviliðinu tókst hratt að ná tökum á eldinum og reykræstingu er nú lokið. Eldsupptökin liggja ekki fyrir en tjón varð aðeins í því herbergi, þar sem eldurinn kviknaði. Reykræsta þurfti þó víðar á hæðinni.

Að sögn Stefáns Kristinssonar, varðstjóra hjá Slökkviliðinu, slasaðist enginn en dvalargestir rýmdu húsið að megninu til og biðu fyrir utan meðan á slökkvistörfum stóð. 

Allt tiltækt slökkvilið var kallað út, en þegar ljóst var að umfangið var ekki meira en raun bar vitni, var liðsauki afturkallaður. 

• Blogga um frétt