Innlent | mbl | 11.9.2022 | 22:11 | Uppfært 16.8.2023 11:19

Segja yfirlýsingu Sólveigar Önnu skaðlega

Nichole Leigh Mosty er formaður samtakanna. mbl.is/Ómar Óskarsson

Samtök kvenna af erlendum uppruna á Íslandi gagnrýna harðlega ummæli Sólveigar Önnur Jónsdóttur, formanns Eflingar, er lutu að tillögum Eiríks Rögnvaldssonar, prófessors emeritus í íslensku.

Frétt af mbl.is

Segir skilningsskort Sólveigar Önnu dapurlegan

Eiríkur lagði til að verkalýðshreyfingin gerði kröfu um það að fyrirtæki byðu starfsfólki að sækja íslenskunámskeið, á vinnutíma og þar af leiðandi á kostnað vinnuveitanda. Sólveig Anna var harðorð í garð Eiríks og sagðist hafa mikilvægari hluti að hugsa um.

Forsenda félagslegrar aðlögunar

„Það er mikilvægt að hafa í huga að hún er formaður stærsta stéttarfélags á Íslandi sem er með stærsta hlutfall félagsmanna af erlendum uppruna. Yfirlýsingin er skaðleg áratugalangri baráttu okkar sem hafa flutt hingað til Íslands um að fá aukinn aðgang að vönduðum íslenskunámskeiðum af hendi atvinnurekenda,“ segir í yfirlýsingu sem Samtök kvenna af erlendum uppruna á Íslandi hafa sent frá sér.

Er þar bent á að gagnvirk aðlögun á vinnumarkaði sé í mörgum tilfellum forsenda fyrir samfélagslegri aðlögun. Stuðningur á vinnumarkaði við að sækja vönduð tungumálanámskeið sé lykillinn að gagnvirkri aðlögun í samfélaginu og þróun á vinnumarkaði almennt.

„Margir starfsmenn af erlendum uppruna fá hvorki aðstoð né raunverulegan aðgang að íslenskunámi frá vinnuveitendum sem oft krefjast lágmarks íslenskukunnáttu.“

Fyrirheit um stuðning og aukið aðgengi að íslenskunámskeiðum á vinnustöðum kæmi til með að fela í sér miklar framfarir fyrir fólk af erlendum uppruna, sem taki oft við störfum, sem séu ekki í samræmi við þeirra menntun eða starfsreynslu.

„Kemur í flestum tilfellum beint frá okkur“

Samtökin mótmæla því harðlega að spurn eftir íslenskunámskeiðum fyrir starfsfólk af erlendum uppruna, stafi frá „menntaelítu,“ og vísa þar með í orð Sólveigar Önnu.

„Raunveruleikinn er sá að hann kemur í flestum tilfellum beint frá okkur. Við vonum svo sannarlega að þau stéttarfélög sem berjast fyrir jöfnum launum og jafnrétti á vinnumarkaði, skilji gildi þess að veita okkur jafnan aðgang að íslenskri tungu auk sveigjanleika og stuðningi vinnuveitenda við að læra hana.“

Þá vísa samtökin til könnunar sem birt var árið 2021. Þar komu fram þau málefni sem konur af erlendum uppruna mátu mikilvægust.

„Við hvöttum yfirvöld, vinnuveitendur, ríki og sveitarfélög, til að taka mark á og bregðast við þessum niðurstöðum okkar. Mikilvægasta aðgerð sem hægt væri að ráðast í, tengist stuðningi við aðgang að vönduðum íslenskunámskeiðum. Yfirgnæfandi fjöldi svarenda óskaði eftir stuðningi við íslenskukennslu þar sem þeir töldu að það myndi hafa bein áhrif á efnahags- og samfélagsvöxt ef ekkert væri gert í því. Ef ekki væri brugðist við myndi það áfram hafa áhrif á konur af erlendum uppruna sem upplifa ójöfnuð í samfélaginu.“

Samtökin mæla eindregið með því að forysta stéttarfélaga, með félagsmenn af erlendum uppruna, geri rannsóknir meðal félagsmanna, af erlendum uppruna, til að ákvarða hversu mikilvægur stuðningur atvinnurekenda á íslensku er.

Ánægjulegt að fá stuðning fræðimanna

„Stéttarfélögunum sem þiggja háar fjárhæðir félagsgjalda frá félagsmönnum af erlendum uppruna, á að vera skylt að gera sér grein fyrir ábyrgð sinni í að styðja við jafnrétti á vinnumarkaði og raunveruleg tækifæri til árangurs á íslenskum vinnumarkaði fyrir starfsmenn af fjölbreyttum uppruna.“

„Það er okkur mikil ánægja að sjá fræðimenn úr íslenska menntakerfinu loksins standa með okkur í að viðurkenna þá skyldu vinnumarkaðarins að styðja við víðtækari aðgang að tækifærum til að læra íslenska tungu. Auk þess vonum við innilega að yfirlýsing okkar verði tekin til greina af forystu beggja megin samningaborðsins í kjarasamningaviðræðum.“