Innlent | mbl | 12.9.2022 | 12:43

Tilkynnt um 21 nauðgun á mánuði

Lögreglan að störfum í miðbæ Reykjavíkur. mbl.is/Ari

Tilkynningar um 125 nauðganir voru skráðar af lögreglunni fyrstu sex mánuði þessa árs, sem samsvarar 28% fjölgun frá því í fyrra.

Ef borið er saman við sama tímabil síðustu þrjú ár þar á undan þá fjölgar skráðum nauðgunum um 30%. Að meðaltali eru núna skráðar tilkynningar um 21 nauðgun á mánuði hjá lögreglunni.

Þetta kemur fram í tilkynningu frá lögreglunni í tilefni af nýrri skýrslu ríkislögreglustjóra um kynferðisbrot sem hefur verið birt á vefsvæði lögreglunnar.

66% á höfuðborgarsvæðinu

Í málaskrá lögreglunnar vegna kynferðisbrota er bæði skráð hvenær brot eru tilkynnt og hvenær þau áttu sér stað. Ástæða þess er að oft líður tími á milli þess að brotið á sér stað og tilkynnt er um það til lögreglu.

Þegar horft er til tíma brots var tilkynnt um 83 nauðganir sem áttu sér stað fyrstu sex mánuði ársins eða 14 nauðganir á mánuði, sem samsvarar 1% fækkun frá því í fyrra. Þegar skoðuð er tímasetning nauðgana eftir árum og embættum um helgar þá á 66% þeirra sér stað á höfuðborgarsvæðinu og 65% þeirra frá 18:00-06:00 að morgni.

Línulegur vöxtur frá 2010

Nær línulegur vöxtur var í tilkynntum nauðgunum frá 2010. Þeim fækkaði þó verulega á meðan sóttvarnartakmarkanir stóðu sem hæst í kórónuveirufaraldrinum. Þegar losað var aftur um takmarkanir fjölgaði tilkynntum nauðgunum til lögreglunnar á nýjan leik.

Vitundarvakning dómsmálaráðuneytisins, Neyðarlínunnar, ríkislögreglustjóra, lögreglunnar og fjölda annarra samstarfsaðila undir slagorðunum „Verum vakandi“ og „Góða skemmtun“ sem hófst í mars og lauk nú um miðjan ágúst var því beint sérstaklega að skemmtanalífinu og viðburðum með það tvíþætta markmið að fækka brotum og fjölga tilkynningum til lögreglunnar.

Lögreglan skráði í allt 328 tilkynningar um kynferðisbrot á tímabilinu, sem samsvarar 5% fjölgun frá síðustu þremur árum þar á undan.

Skráðum kynferðisbrotum fækkar

Ef borið er saman við fyrstu sex mánuði ársins 2021 fækkar í heildina skráðum kynferðisbrotum um 9% á milli ára. Skráðum blygðunarsemisbrotum og kynferðisbrotum gegn börnum fækkar. Brot vegna kynferðislegrar áreitni og brot gegn kynferðislegri friðhelgi heldur hins vegar áfram að fjölga, og voru 64 á tímabilinu.

Til samanburðar var tilkynnt um 36 brot að jafnaði síðustu þrjú ár þar á undan, eða aukning um 78%.

Meðalaldur grunaðra er 35 ár og voru 95% þeirra karlar, þar af 33% undir 25 ára.