168 daga bið barna eftir sálfræðingi

Meðalbiðtími barna eftir því að komast að hjá sálfræðingi hjá heilsugæslu á höfuðborgarsvæðinu eru 168 dagar og eru alls 618 börn á bið eftir slíkri þjónustu. Þetta kemur fram í tilkynningu Umboðsmanns barna en hann hefur nýlega staðið fyrir upplýsingaöflun um fjölda barna sem bíða eftir þjónustu hjá ýmsum aðilum.

Þar kemur einnig fram að meðalbiðtími eftir þjónustu á göngudeild, transteymi og átröskunarteymi Barna- og unglingageðdeildar LSH hefur styst, ef bornar eru saman upplýsingar frá þessu ári og lok síðasta árs. 

Frétt af mbl.is

Börn látin bíða svo mánuðum skiptir

Óvenju margar tilvísanir

Þá hefur fjöldi barna (0-18 ára) sem bíða eftir þverfaglegri greiningu hjá Ráðgjafar og greiningarstöð, aukist en tilvísanir til stofnunarinnar voru óvenju margar á seinasta ári.

Meðalbiðtími barna á aldrinum 6 til 18 ára, eftir þverfaglegu greiningunni aukist úr 12 til 14 mánuðum í 15 mánuði. Aftur á móti hefur meðalbiðtími styst úr 19 mánuðum í 16,2 mánuði á sviði barna á aldrinum 0 til 5 ára. 

Samtals eru 393 börn á bið eftir þverfaglegri greiningu.

Frétt af mbl.is

584 börn bíða sérhæfðar greiningar

Um 12 til 14 mánaða bið eftir ADHD greiningu

Meðalbiðtími eftir ADHD greiningu hjá Geðheilsumiðstöð barna (áður Þroska- og hegðunarstöð) er enn sá sami, eða 12 til 14 mánuðir en fjöldi barna á bið hefur aukist úr 738 í 830.

Þá er bið eftir einhverfugreiningu 22 – 24 mánuðir að meðaltali.

17 mánaða meðalbið

Meðalbiðtími barna eftir þjónustu frá Heilsuskóla Barnaspítalans er 17 mánuðir eins og stendur og eru 110 börn á biðlista.

Heilsuskólinn aðstoðar börn og fjölskyldur þeirra sem eru 2,5 staðalfrávikum fyrir ofan meðalkúrfu í BMI eða börn sem hafa verið með mikla þyngdaraukningu á stuttum tíma. Í Heilsuskólanum eru fjölskyldum kenndar aðferðir til að takast á við þyngdarstjórnun og viðhalda breytingum ásamt því að bæta lífsgæði til lengri tíma.

11% á biðlista lengur en 2 ár

Sjúkratryggingar Íslands gerðu nýverið úttekt á stöðu barna á biðlistum hjá talmeinafræðingum af beiðni heilbrigðisráðuneytisins. Slíkir biðlistar eru ekki samræmdir og því erfitt að meta raunverulega stöðu hverju sinni, segir í tilkynningunni.

Alls voru 3.701 barn skráð á biðlista hjá talmeinafræðingum í desember 2021. Þar af voru 947 skráð á fleiri en einum stað. Höfðu 30% barna beðið í 0 til 6 mánuði en um 11% höfðu verið á biðlista lengur en 2 ár.

• Blogga um frétt