Katrín Jakobsdóttir forsætisráðherra, og jafnframt formaður þjóðaröryggisráðs, segir í samtali við mbl.is að fulltrúar þjóðaröryggisráðs hafi verið upplýstir um aðgerðir sérsveitar ríkislögreglustjóra vegna hryðjuverkaógnar í gær. 

Spurð hvort að fulltrúar hafi verið upplýstir fyrir eða eftir aðgerðir lögreglu segir Katrín það hafa verið gert um það leyti sem aðgerðir fóru af stað. 

Lögreglan stóð sig mjög vel

„Eins og sjá má á þessari aðgerð í gær stóð lögreglan sig mjög vel í að ná utan um hættulega stöðu. Ég held að þetta sé staða sem erfitt er að eiga við – hér er til dæmis um þrívíddarprentuð vopn að ræða – það er ekki auðvelt að eiga við það þegar verið er að nota lögmæt tæki til að gera algjörlega stórhættulega hluti,“ segir Katrín og ítrekar skoðun sína á því hve vel lögreglan hafi staðið sig. 

Þurfum að vera á tánum

„Í framhaldinu munu stjórnvöld fara yfir stöðu með lögreglunni. Þegar hefur verið ráðist í ákveðnar aðgerðir til að efla lögregluna eins og að fjölga menntuðum lögreglumönnum. Við munum áfram þurfa að vera á tánum hvað varðar það að lögreglan sé í stakk búin til að mæta nýjum hættum.“

Katrín segir að þjóðaröryggisráð muni fara yfir málið í framhaldinu „en ekki í neinu hasti núna“.

„Lögreglan er með þetta undir stjórn, en að sjálfsögðu fara svo yfir þessa atburði þegar aðeins er um liðið.“

Tengdar fréttir

Ákært fyrir hryðjuverk

Hryðjuverkamálinu áfrýjað til Landsréttar

• Ekki búið að áfrýja málinu: Vika til stefnu
• „Þetta var ekkert grín“
• Hryðjuverkalöggjöfin geti verið endurskoðuð
• Ríkið greiðir bróðurpart málsvarnarkostnaðar Sindra og Ísidórs

» Fleiri tengdar fréttir

• Blogga um frétt