Geta ekki lengur hugsað sér að fara á árshátíð
Gunnhildur Sif Oddsdóttir
Setja bókamerki
„Þetta er bara hræðilegt. Þú getur ímyndað þér að ef þú ert maki lögreglumanns og ætlaðir með honum á árshátíð að þú sért í lífshættu við það,“ segir Fjölnir Sæmundsson, formaður landssambands lögreglumanna.
Hann bætir við: „Það er alveg hræðilegt ef einhver hefur ætlað sér að ráðast á lögreglumenn og fjölskyldur þeirra í frítíma.“
Samkvæmt heimildum Morgunblaðsins sýndu mennirnir fjórir, sem voru handteknir í umfangsmiklum aðgerðum á miðvikudag, árshátíð lögreglumanna, sem halda á í næstu viku, sérstakan áhuga.
Fjölnir segir málið hræðilegt og bætir við að þetta sé ekki þjóðfélag sem við héldum að við byggjum í. „Þó svo maður viti nú ýmislegt verandi í lögreglunni um skuggahliðar samfélagsins. Þá er þetta einhver ný þjóðfélagsgerð.“
Einhverjir geti ekki hugsað sér að mæta
Fjölnir segist ekkert hafa heyrt um að fresta eigi árshátíðinni. „En ég hef svo sem heyrt að margir geti ekki lengur hugsað sér að fara á árshátíð og að makar lögreglumanna geti ekki hugsað sér að sækja árshátíð hjá lögreglunni þegar svona fréttir koma. Fólk er dálítið miður sín.“
Spurður hvort að funda eigi um þetta mál segir Fjölnir að stjórn landssambandsins muni auðvitað koma saman og ræða þetta en auk þess sé lögreglan með alls kyns spjallþræði og tölvupóstasamskipti og að málið sé í fullri umræðu.
„Það er bara hljóð í lögreglumönnum og þeir eru áhyggjufullir og velta fyrir sér á hvaða breytingar þetta kalli,“ segir Fjölnir.
Hópur fólks reyndi að komast að eldgosinu
Rússar sagðir útvega N-Kóreu milljón olíutunnur
Hótar Bretum og Bandaríkjamönnum
Pútín reynir allt til að forðast aðra herkvaðningu
Vegirnir voru eins og borðstofuborð
Yfir 300 stæði fóru undir hraun