„Hamast við að vinna í þessu“
Setja bókamerki
Vinna stendur enn yfir við uppsetningu nýs viðvörunarkerfis í Reynisfjöru. „Það er verið að hamast við að vinna í þessu,“ segir Björn Ingi Jónsson, verkefnastjóri almannavarna hjá lögreglustjóranum á Suðurlandi.
„Það er keppikefli allra að þetta fari upp sem allra fyrst,“ bætir hann við.
Viðvörunarkerfið á að vara við hættunni sem getur skapast í Reynisfjöru, en þar hafa orðið banaslys þegar öldur hafa hrifið fólk með sér á haf út. Erlendur ferðamaður lést þar í júní síðastliðnum.
Töluverð vinna
Spurður segir Björn Ingi vinnuna vera töluverða. Eitt viðvörunarskilti verður sett upp með viðvörunarljósum, auk fleiri skilta. Þangað til verða skiltin sem fyrir eru höfð uppi til að vara ferðamenn við hættunni.
Hann býst við því að nýju skiltin fari upp annað hvort í þessari eða næstu viku. Verið er að ljúka við hönnun á þeim auk þess sem verið er að grafa fyrir undirstöðum.
Nokkur útköll hjá Landsbjörg
Lítil snjóflóð fallið og vegum lokað á Vestfjörðum
Fundaði með starfsfólki í fjóra tíma í gær
Máttu ekki auglýsa „mesta úrvalið“ og „besta verðið“
„Átti von á fleiri útköllum“
Leiðindaveður yfir jólahátíðina
„Á allt sitt undir því að njóta trausts almennings“