Innlent | mbl | 29.9.2022 | 11:16 | Uppfært 11:41

Áhrif brunans mikil – þvotturinn sendur á Höfn

Húsnæði verslunar- og þvottahúsnæðis Vasks gjöreyðilagðist í brunanum. mbl.is/Sigurður Aðalsteinsson

Áhrif vegna brunans í verslunar- og þvottahúsnæði Vasks eru mikil á hótelstarfsemi á Egilsstöðum. Vaskur er eitt helsta þjónustufyrirtæki Hotel 1001 Nott á Egilsstöðum þar sem allur þvottur er sendur í þvottahús Vasks. Til þess að halda hótelinu gangandi þarf nú að keyra í tæpar þrjár klukkustundir til þjónustuaðila á Höfn í Hornafirði með þvottinn á meðan lausn verður fundin.

Frétt af mbl.is

Slökkvistarfi lokið en enn rýkur úr glæðum

Hreint á rúmum

„Þetta hefur mikil áhrif á okkur en við erum með fullt hótel alla daga þannig að við þurfum að bjarga okkur og förum næstu daga með þvottinn til þjónustuaðila á Höfn í Hornafirði. Þetta eru 35 rúm sem þarf að skipta á daglega og það er því engin leið fyrir okkur að bjarga okkur með venjulegum þvottavélum og þurrkurum. Þetta verður að vera í þvottahúsi sem er með allar nauðsynlegar græjur,“ segir Kristín, hótelstýra og eigandi Hotel 1001 Nott.

Starfsmenn Hotel 1001 Nott þurfa að keyra langa leið til þjónustuaðila á Höfn í Hornafirði með þvottinn. Ljósmynd/Google Maps

Standa við skuldbindingar gagnvart gestum

Kristín segir mikinn samhug ríkja á Egilsstöðum og finni þau fyrst og fremst til með eigendum Vasks.

„Það er gríðarlega mikilvægt að við höldum áfram okkar striki og fórum við strax í að finna lausn. Það er einnig gríðarlega mikilvægt fyrir ferðaþjónustuna á Íslandi að hægt sé að treysta á gistingu sem hefur verið bókuð."