Engin sáttatilboð hafi verið lögð fram
Setja bókamerki
Fanney Rós Þorsteinsdóttir ríkislögmaður segir engin sáttatilboð hafa verið lögð fram af hálfu ríkisins vegna kæru frambjóðanda Pírata og frambjóðanda Viðreisnar er varðar kosningar til Alþingis í Norðvesturkjördæmi á síðasta ári.
Hún segir að mál fyrir Mannréttindadómstól Evrópu fari í ákveðið ferli og hluti af því ferli sé að ræða við lögmenn kærenda um möguleika á sáttum.
„Þegar að spurningar eru sendar til ríkisins þá fer í gang formlegt ferli, sem kallast Friendly settlement. Þá tökum við upp símann og ræðum við lögmenn kærenda og það er það sem fór fram.“
Kærðu til MDE
Greint var frá því í morgun að tilraun hafi verið gerð til að ná sáttum í kærumáli Magnúsar Davíðs Norðdahl, frambjóðanda Pírata í Norðvesturkjördæmi í síðustu alþingiskosningum, og Guðmundar Gunnarssonar, frambjóðanda Viðreisnar.
Magnús og Guðmundur kærðu þá ákvörðun Alþingis til Mannréttindadómstóls Evrópu um að staðfesta síðari kosningaúrslitin þrátt fyrir að ekki hafi verið rétt staðið að talningu og framkvæmd.
Hægt að ná sáttum án þess að viðurkenna brot
Að sögn Fanneyjar kemur ekki til greina að ríkið gangist við broti á ákvæðum sáttmálans í þessu tilviki. Hún segir þó að almennt sé hægt að sætta mál fyrir dómstólnum án þess að viðurkenna brot.
„Það er algengt meðal aðildarríkja að það séu gerðar svokallaðar ex gratia sáttir. Það þýðir að mál eru sætt án þess að brot gegn sáttmálanum sé viðurkennt. Er málum þannig lokið með greiðslu hóflegra bóta og þau felld niður fallist dómstóllinn á þau málalok. En í þessu máli var niðurstaðan sú að ríkið tæki til varna og vinnur nú að greinargerð í málunum.“
Hafa frestað greinargerð
Þá segir ríkislögmaður rangt með farið að ríkið hafi átt að skila greinargerð þann 13. september vegna málsins heldur hafi upphaflega dagsetningin verið 22. september. Sá frestur var framlengdur til 13. október að beiðni ríkisins.
Aðspurð segir Fanney gríðarlegar annir hafa gert það að verkum að ekki hafi tekist að skila greinargerðinni innan tilsetts tíma.
Evrópuumræðu laumað á dagskrá
„Það var ekki dæmt löglegt að mismuna börnum“
Kannanir nákvæmari en fyrir fjórum árum
Tekur ekki undir orð Ragnars Þórs og Ásthildar Lóu
Vilja flytja út fisk gegnum Ísland
Lögmæti og heilindi dregin í efa
Foreldrum sagt að heimanám væri verkfallsbrot
Með réttarstöðu sakbornings við rannsókn banaslyss