Utanvegaakstur jókst í faraldrinum

Ásta Kristín Davíðsdóttir, yfirlandvörður og sérfræðingur í teymi náttúruverndarsvæða hjá Umhverfisstofnun, segir að náttúruspjöll vegna utanvegaaksturs hafi aukist í Covid-19-faraldrinum. Hún telur aðallega Íslendinga vera að verki. 

„Það er búinn að vera mikill ólöglegur utanvegaakstur í kringum höfuðborgarsvæðið. Við erum að reyna að kæra og reyna að vekja athygli á þessu,“ segir Ásta Kristín í samtali við mbl.is.

„Ég held þetta sé aðallega fólk búsett á Íslandi. Auðvitað eru ferðamenn að gera þetta líka en það sem ég verð vör við er allt fólk búsett á Íslandi.“

Í síðustu viku tilkynnti Umhverfisstofnun um náttúruspjöll í nágrenni höfuðborgarsvæðisins, þar á meðal á Vigdísarvallaleið.

Frétt af mbl.is

Ítrekaður utanvegaakstur á friðlýstu svæði

Svæðið metið rautt 

Ásta Kristín segir að á síðasta ári hafi verið gert ástandsmat á Vigdísarvallaleið og var svæðið metið rautt eftir litakóðakerfi Umhverfisstofnunar um ástand friðlýstra svæða.

„Svæðið var þá orðið svo illa farið eftir utanvegaakstur sem jókst í Covid-19 faraldrinum og er bara að aukast stöðugt. Þetta er mjög illa farið þarna,“ segir Ásta Kristín.

Hún segir sömu sögu að segja í Bláfjöllum og á fleiri stöðum.

„Þetta er rosalega sorglegt því þetta er alveg gríðarlega fallegt og verðmætt svæði fyrir útiveru og andlega og líkamlega heilsu fólks.“

Ásta Kristín Davíðsdóttir. Morgunblaðið/Sigurður Bogi

Utanvegaakstur lengi bannaður með lögum

Ásta segir að þau hjá Umhverfisstofnun verði sjaldan vitni að utanvegaakstrinum heldur tilkynni fólk í útivist á svæðinu verknaðinn.

„Við erum að horfa á mótorhjól, fjórhjól og buggy-bíla. Það er alveg hræðileg innkoma af buggy-bílum þarna,“ segir Ásta Kristín og bætir við að bílar keyri svo í förunum sem myndast.

Hún segir að utanvegaakstur hafi verið bannaður með lögum í um hálfa öld nema fyrir þrjá hópa sem geta fengið undanþágu. Landverðir fái ekki undanþágu til að keyra utanvegar á friðlýstum svæðum.

„Það eru landbúnaðarstörf, björgunarstörf – þegar björgun á sér stað, ekki æfingar – og svo eru það vísindastörf. Þetta er allt nauðsynlegt til að fá undanþágu.“

• Blogga um frétt