Forsætisráðherra hefur skipað Hrafnhildi Arnkelsdóttur í embætti hagstofustjóra frá og með 1. nóvember. Þetta kemur fram í tilkynningu frá stjórnarráðinu.
Embættið var auglýst laust til umsóknar 13. ágúst og bárust alls 14 umsóknir en þrír drógu umsókn sína til baka.
Skipaði forsætisráðherra þriggja manna ráðgefandi hæfnisnefnd til að leggja heildarmat á hæfni umsækjenda. Hæfnisnefndin mat þrjá umsækjendur mjög vel hæfa til að gegna embætti hagstofustjóra.
„Að loknum viðtölum við þá þrjá umsækjendur sem hæfnisnefndin mat mjög vel hæfa og eftir heildarmat á gögnum málsins var það niðurstaða forsætisráðherra að Hrafnhildur Arnkelsdóttir væri hæfust til að gegna embætti hagstofustjóra,“ segir í tilkynningu.
Hrafnhildur er með Ph.Lic. gráðu í líftölfræði frá Gautaborgarháskóla, BSc gráðu í tölfræði og kerfisfræði frá Lundarháskóla og BSc gráðu í iðjuþálfun frá Vårdhögskolan í Gautaborg.
Hrafnhildur hefur starfað sem stjórnandi hjá Hagstofu Íslands frá árinu 2005, sem sviðsstjóri félagsmálasviðs frá árinu 2014 en áður sem sviðsstjóri þjónustu- og þróunarsviðs og deildarstjóri launa- og kjaramáladeildar. Þar áður var Hrafnhildur m.a. forstöðumaður kjararannsóknarnefndar í 8 ár.