Mikill verðmunur á umfelgun

Mikill verðmunur er á þjónustu við dekkjaskipti og er hæsta verðið allt að 64-90% hærra en það lægsta. Þetta kemur fram í verðkönnun sem FÍB framkvæmdi í vikunni.  

Bílaverkstæði No.22 í Reykjavík býður upp á lægsta verðið á umfelgun á 16 tommu álfelgum, og kostar hún 8.500 krónur. 

Hæsta verðið hjá Nesdekki

Hæsta verðið er hins vegar hjá Nesdekki þar sem umfelgun á 16 tommu álfelgum kostar 13.990 krónur, og því er verðmunur um 65%. 

Bifreiðaverkstæði Borgarfjarðar er með lægsta verðið á umfelgun á 18 tommu álfelgum, þar sem umfelgun kostar um 10.000 krónur. Lægsta verðið á höfuðborgarsvæðið er hjá Bílaverkstæði No.22 þar sem umfelgun kostar 11.500 krónur. 

Ekki spurt út í gæði þjónustunnar

Hæsta verðið á umfelgun á 18 tommu álfelgum er eins og í fyrra skiptið, hjá Nesdekki en þar kostar umfelgun um 18.990 krónur. Því nemur verðmunurinn um 90% milli hæsta og lægsta verðs. 

Í tilkynningu frá FÍB segir að það megi gera ráð fyrir að álfelgur séu undir 70% fólksbíla hérlendis. Einnig kemur fram að ekki var spurt um gæði þjónustunnar við gerð verðkönnunarinnar. 

• Blogga um frétt