Ávanabindandi og töfrandi gufubað

Undanfarin rúm þrjú ár hefur fólk getað farið í gufubað í sérstaklega útbúnu hjólhýsi á völdum stöðum við sjávarsíðuna, fyrst og fremst á höfuðborgarsvæðinu en einnig úti á landsbyggðinni. Fyrir um mánuði var nýtt og stærra hjólhýsi tekið í notkun og hefur verið boðið upp á svokallaða gufugusu í því í Gufunesi að undanförnu. „Þetta hefur gengið prýðilega og nýja vagninum hefur verið vel tekið,“ segir Hafdís Hrund Solveigar Gísla, sem á og rekur fyrirtækið Rjúkandi fargufu.

Hafdís kynnti sér baðmenningu í Kaupmannahöfn og féll fyrir þessari gufubaðsmenningu. Hún hafði áður unnið hjá ÍTR á Ylströndinni í Nauthólsvík og vildi tengjast sjónum með einhverjum hætti, enda stundað sjóböð reglulega um árabil. Hún byrjaði ein en nú hafa Olga Hörn Fenger og Vala Baldursdóttir bæst í gusuhópinn svokallaða.

Þátttakendur fara gjarnan í sjóinn eftir gott gufubað. mbl.is/Eggert Jóhannesson

Vagninn hefur einkum verið í Gufunesi, við Skarfaklett, hjá grásleppuskúrunum neðan við Ægisíðu, úti við Gróttu, á Álftanesi, við Kópavogshöfn og við Hafravatn. Hafdís hefur líka boðið upp á fargufu við Laugarvatn, á Snæfellsnesi, Dalvík og víðar.

Nánari umfjöllun er að finna í Morgunblaðinu sem kom út 28. október. 

„Það er ákveðin þolraun að sitja í hitanum í 12 til 15 mínútur í einu en þegar fólk kemst upp á lag með þetta kemst það að því að í þessu felast ótrúlega miklir töfrar. Maður sefur eins og barn á eftir og þegar fólk kemur í fyrsta skipti verð ég að vara það við því þetta getur verið ávanabindandi!“ mbl.is/Eggert Jóhannesson