Hann dó þrisvar í höndunum á mér

Gunnar Flóki Sigurðsson, ávallt kallaður Flóki, býr í Lissabon og keyrir um með ferðamenn í svokölluðum tuktuk. Á þeim þremur árum sem hann hefur búið í Portúgal hefur hann bjargað fjórum mannslífum.

Náði að lífga hann við

„Það var 24. september í fyrra að ég var að gera mig kláran að fara heim. Þá sá ég fjölda fólks horfa í áttina að einum stað og fer að athuga málið. Þar sá ég ungan mann liggja á jörðinni og tvær konur að stumra yfir honum. Ég kom þar að og sá að hann var látinn og byrjaði strax að hnoða. Það var hringt á sjúkrabíl sem kom tíu mínútum síðar. Ég náði að lífga hann við. Hann dó þrisvar í höndunum á mér en ég náði að halda honum á lífi. Hann var lifandi þegar hann fór inn í sjúkrabílinn,“ segir Flóki og segist hafa fengið áfall eftir að sjúkrabíllinn fór, en ungi maðurinn var aðeins rúmlega þrítugur.

„Ég settist niður í tuktuknum mínum og var bara stjarfur. Ég brotnaði alveg niður og grét alla leiðina heim,“ segir hann.

„Þetta var á fimmtudegi. Á föstudegi fann ég hann svo á Instagram og sendi skilaboð til að athuga með hann. Ég fékk engin svör fyrr en á mánudagsmorgni, en þá sat ég á kaffihúsi með konunni minni. Þá kom svar frá stráknum sjálfum, Daniel, og hann þakkaði mér lífbjörgina,“ segir Flóki.

Flóki og Daniel eru orðnir mestu mátar eftir að Flóki bjargaði lífi hans í fyrra.

„Ég brotnaði aftur niður þegar ég fékk skilaboðin,“ segir Flóki en í dag eru þeir vinir og hittast reglulega.

„Hann bauð mér í afmælið sitt og þegar hann er í miðbænum hitti ég hann í spjall.“

Ítarlegt viðtal er við Flóka í Sunnudagsblaði Morgunblaðsins um helgina.