Innlent | mbl | 31.10.2022 | 17:34 | Uppfært 19:29

Guðlaugur segir rangt að hann hafi krafist fjármálaráðuneytisins

Guðlaugur Þór Þórðarson og Bjarni Benediktsson munu takast á um formannsembætti Sjálfstæðisflokkins á landsfundi sem fer fram um næstu helgi. Samsett mynd

Guðlaugur Þór Þórðarson, umhverfis- og orku- og loftslagsráðherra, segir það ekki rétt að hann hafi gert kröfu um að fá að gegna embætti fjármála- og efnahagsráðherra í skiptum fyrir að hætta við framboð til formanns Sjálfstæðisflokksins.

Frétt af mbl.is

Bjarni og Guðlaugur virkja stuðningsmenn sína

Guðlaugur svaraði í Facebook-færslu frétt Innherja þar sem segir að samkvæmt heimildum miðilsins, hafi þessi krafa verið rædd á fundum Guðlaugs og Bjarna Benediktssonar, fjármála- og efnahagsráðherra, í síðustu viku.

Í færslunni staðfestir Guðlaugur að þeir hafi fundað tvisvar, annars vegar í fjármálaráðuneytinu á fimmtudag og heima hjá Bjarna á föstudaginn. Þá hafi þeir einnig rætt stöðuna sem upp er komin og áhyggjur Guðlaugs.

„Um aðrar fullyrðingar í frétt Innherja er það að segja að það er allsendis ósatt að á þessum fundum hafi ég gert einhverjar kröfur til Bjarna Benediktssonar í skiptum fyrir að hætta við formannsframboð.“