Ríkið sýknað í Hæstarétti í máli Gráa hersins

Hæstiréttur staðfesti í dag sýknudóm héraðsdóms í þremur málum þriggja félaga úr Gráa hernum, baráttuhópi eldra fólks um lífeyrismál, vegna skerðinga í almannatryggingakerfinu.

Var í málinu látið reyna á það hvort skerðingar í almannatryggingakerfinu standist stjórnarskrá, meðal annars eignaréttarákvæði hennar. Gjafsóknarkostnaður í máli allra þriggja greiðist úr ríkissjóði, auk þóknunar lögmanna þeirra. 

Með skerðingum væri unnið gegn stjórnarskrá

Héraðsdómur sýknaði ríkið af kröfum félaganna í desember 2021.

Máls­höfðunin var reist á því sjón­ar­miði að með skerðingu op­in­berra líf­eyr­is­greiðslna í hlut­falli við rétt­indi, sem elli­líf­eyr­istak­ar hafa áunnið sér í líf­eyr­is­sjóðum með vinnu­fram­lagi sínu og iðgjöld­um, sé gengið gegn stjórn­ar­skrár­vörðum eign­ar­rétti líf­eyr­istaka. Taldi Grái her­inn að skerðing­in nemi allt að 56,9% af greiðslum úr líf­eyr­is­sjóði.

Ekki ólögmæt mismunun og ekki sýnt að eignaréttindi hafi verið skert

Taldi Hæstiréttur í máli eins þeirra að skerðingarnar hafi hvílt á málefnalegum sjónarmiðum, séu almennar og geri ekki slíkan greinarmun á einstaklingum að þær feli í sér ólögmæta mismunun, andstætt fyrirmælum 62. gr. stjórnarskrárinnar. 

Þá var ekki talið að Grái herinn hafi sýnt fram á að með fyrirmælum laga um lífeyrisréttindi hans sem njóta verndar eignaréttarákvæðisins hafi verið skert eða takmörkuð auk þess sem lög frá 2016 um almannatryggingar og lög frá 2017 um almannatryggingar hafi í engu tilliti breytt greiðslum einstaklinganna úr lífeyrissjóðum samkvæmt réttindum sem hann hefði áunnið sér á grundvelli iðgjalda.

Fréttin hefur verið uppfærð.

Frétt af mbl.is

Ríkið sýknað að fullu í máli Gráa hersins

• Blogga um frétt