„Adrenalín og kærleikur renna um blóðið“

Um hundrað manns komu saman í líkamsræktarstöðinni Afreki í kvöld til að fylgjast með Einari Hansberg Árnasyni sem var kominn á fimmtugustu klukkustund einnar samfelldrar æfingar.

Frétt af mbl.is

Viðstöðulausar æfingar í rúma tvo sólarhringa

Eins og mbl.is hefur fjallað um var ætlunin með aflraun Einars að vekja athygli á starfsemi Píeta-samtakanna á árstíma sem reynist mörgum erfiður. Kveikjan að þessu tiltekna átaki var fráfall móðurbróður hans sem af slysförum fyrir ári síðan, 56 ára gamall.

Þungri byrði sleppt úr mjaðmahæð

Síðasta æfingin var ekkert tilkomumeiri en hinar. Réttstöðulyfta, sextíu kíló, ellefu sinnum.

Þetta var æfingarlota númer tvöhundruð. Réttstöðulyfturnar voru þannig orðnar 2.200 talsins.

Eftir að hafa sleppt stönginni úr mittishæð sneri Einar að skaranum og fórnaði höndum. „Þetta er komið,“ mátti lesa út úr líkamstjáningu Einars.

Hafði haft fimmtíu klukkustundir til að undirbúa ræðuna

Þegar hópurinn áttaði sig á því að aflrauninni var í raun lokið var símum sleppt og mikil fagnaðarlæti tóku við með tilheyrandi lófataki og upphrópunum. Skrautræmum rigndi yfir Einar og börn klædd bolum merktum Píeta-samtökunum hlupu að kappanum og föðmuðu hann.

mbl.is/Baldur

Einar tók sér stutta stund í að kæsta mæðinni en steig því næst upp á svartmálaðan trékassa. Hann þakkaði öllum fyrir komuna í ræðu sem hann grínaðist með að hafa haft fimmtíu klukkustundir til að undirbúa:

„Það þarf ekki að grilla á sér líkamann í fimmtíu klukkutíma til að vera góð manneskja. Ég ákvað samt að gera það fyrir málefni sem skiptir máli,“ sagði Einar.

„Við erum ekki bara hér fyrir okkur sjálf heldur erum við hér fyrir aðra líka.“

Í tölu Einars snerti hann einnig á mikilvægi umburðarlyndis í garð náungans. Allir hafi sína byrði að bera, þó hún sé ekki alltaf sýnileg á yfirborðinu.

Einar ávarpaði samkomunna en hann snerti greinilega marga með orðum sínum og gjörðum. Tár mátti víða sjá á hvarmi. mbl.is/Baldur

Aflraun Einars hafði merkjanleg áhrif

Benedikt Þór Guðmundsson, stofnandi Píetasamtakanna, fór næstur upp á pall og sagði frá þeim áhrifum sem framtak Einars hafi hafði haft.

„Það er ótrúlegt, við fundum það í nótt, gærkvöldi og í gærdag. Það er fólk að hringja og biðja um hjálp því það sá hann í tölvunni. Þannig að þú ert ekki bara að hjálpa með því að styrkja Píetasamtökin þú ert líka að hjálpa fólki þarna úti,“ sagði Benedikt á pallinum, sýnilega hrærður af þeim áhrifum sem Einar hafði haft með aflrauninni.

Benedikt Þór Guðmundsson, stofnandi Píetasamtakanna tók til máls fyrir fullum líkamsrætkarsal. mbl.is/Baldur

Bróðir Einars, Heimir Árnason, var til viðtals og sagði fólk jafnt og þétt hafa safnast saman í dag. Gaman hefði verið að ganga upp á ris og horfa yfir salinn í dag, þar sem varla sást í gólfið á tímabili.

Róðrarvél sú sem Einar hafði notað í ferlinu er sem stendur á uppboði og nýjasta tilboðið barst í dag. Hæsta boð stendur í 300.000 krónum en uppboðinu lýkur klukkan 18 á mánudag. Kaupverðið mun renna óskipt til Píetaösamtakanna.

 „Það var einhver ofurhetja sem sat á henni. Þetta er sögulegt,“ segir Heimir.

Fólk kom sér fyrir hvar sem rými gafst í líkamsræktarstöðinni í kvöld. mbl.is/Baldur

Sveif um húsið

Eftir fjölda faðmlaga með tárvotu stuðningsfólk náði blaðamaður mbl.is stuttlega tali af Einari.

„Ég finn bara ekki fyrir neinu en mér líður ágætlega. Adrenalín og kærleikur renna um blóðið,“ sagði Einar. „Maður svífur bara um húsið.“

Spurður hvort hann hafi gert ráð fyrir viðlíka mannfjölda á lokasprettinum svarar Einar því neitandi:

„Ég bjóst við viðbrögðum en, nei, ég bjóst ekki við því að sjá svona marga.“

Einar segir að nú taki samverustundir með fjölskyldunni við og jú, „einhver svefn“.

Píeta-sím­inn er op­inn all­an sól­ar­hring­inn:
552-2218

Reikn­ings­núm­er sam­tak­anna fyr­ir frjáls fram­lög:
0301-26-041041, Kt: 410416-0690

Embætti land­lækn­is bend­ir á að mik­il­vægt sé að þeir sem glíma við sjálfs­vígs­hugs­an­ir segi ein­hverj­um frá líðan sinni, hvort sem er aðstand­anda eða hafi sam­band við Hjálp­arsíma Rauða kross­ins 1717, eða á net­spjalli 1717.is, við hjúkr­un­ar­fræðing í net­spjalli á heilsu­vera.is eða við ráðgjafa í síma Píeta-sam­tak­anna s. 552-2218. Píeta-sam­tök­in bjóða einnig upp á ráðgjöf og stuðning fyr­ir aðstand­end­ur þeirra sem glíma við sjálfs­vígs­hugs­an­ir.

Fyr­ir þau sem misst hafa ást­vin í sjálfs­vígi bend­ir land­læknisembættið á stuðning í sorg hjá Sorg­armiðstöðinni í síma 551-4141 og hjá Píeta-sam­tök­un­um í síma 552-2218.

• Blogga um frétt