Stofnunin ekki orðið áskynja um lögbrot
Setja bókamerki
Hefði Ríkisendurskoðun orðið þess áskynja að lög hefðu verið brotin þegar að 22,5% hlutur ríkisins í Íslandsbanka var seldur í mars þá hefði stofnunin vakið athygli á því, fullyrðir Guðmundur Björgvin Helgason ríkisendurskoðandi í samtali við mbl.is.
„Það er ekki þar með sagt að þó að hlutir hafi misfarist að þeir hafi verið ólöglegir.“
Skýrsla Ríkisendurskoðunar um sölu bankans var birt opinberlega í gær. Þar kemur fram að margir annmarkar hafi verið á sölunni er vörðuðu m.a. upplýsingagjöf og gagnsæi.
Þá kemur einnig fram að takmörkuð greining á tilboðabókinni hafi leitt til þess að eftirspurn var vanmetin sem gæti hafa haft áhrif á niðurstöðuna og skaðað hagsmuni ríkissjóðs.
Ekki sinnt hlutverki sínu samkvæmt lögum
Í skýrslunni segir m.a. að Banskasýslan hafi í aðdraganda söluferlisins ekki sinnt með fullnægjandi hætti hlutverki sínu skv. 3. mgr. 1. gr. laga nr. 88/2009 um stofnunina.
Einnig kemur fram að Bankasýslan hafi tekið ákvörðun um að selja eignarhlutinn á lægra verði til að ná fram öðrum markmiðum en forgangsmarkmiði sínu og meginreglu laga nr. 155/2012 um hagkvæmni eða hæsta verð.
Þá segir auk þess: „Í minnisblaði Bankasýslunnar kom fram um tilboðsfyrirkomulag að slík sala fari fram með lokuðu útboði til hæfra fjárfesta. Bankasýslan taldi því að söluaðferðin væri ekki að fullu í anda meginreglna laga nr. 155/2012 hvað varðar opið söluferli og gagnsæi. Ríkisendurskoðun bendir á að það söluferli sem viðhaft var við söluna 22. mars er almennt kallað opið söluferli á fjármálamarkaði.“
„Ekki að beina athygli að neinum lögbrotum“
Margir hafa velt því fyrir sér hvort að Ríkisendurskoðun hafi í skýrslunni ýjað að því að lög hafi verið brotin. Guðmundur Björgvin segir þó svo ekki vera enda hafi það ekki verið í verkahring stofnunarinnar að skera úr um það. Í skýrslunni sé verið að vekja athygli á að lögin séu matskennd og að ýmislegt hefði mátt betur fara.
Hann fullyrðir þó að ef stofnunin hefði orðið vör við lögbrot þá væri hún búin að benda á það.
„Í skýrslunni erum við að benda á fjölmarga annmarka í söluferlinu. Við erum engu að síður ekki að beina athygli að neinum lögbrotum. Ef við hefðum borið kennsl á lögbrot í þessu ferli þá værum við að benda á það.
Við tökum hins vegar fram í inngangskafla skýrslunnar að það er ekki á valdsviði Ríkisendurskoðunar að bera kennsl á ágreiningsmál hvað varðar lagatúlkun. Þess háttar mál eru ekkert endilega fyrir augunum á okkur en það sem við bendum á í skýrslunni er hvað lögin sjálf eru matskennd.“
Heildarmyndin ekki komin
Hann segir þó ekki tímabært að útiloka að lögbrot hafi átt sér stað í söluferlinu og vísar m.a. til þess að Fjármálaeftirlitið sé enn að vinna sína úttekt er varðar söluaðilana sem komu að útboðinu.
Unnur Gunnarsdóttir, varaseðlabankastjóri fjármálaeftirlits, sagði skýrslu eftirlitsins væntanlega í janúar í samtali við mbl.is fyrr í dag.
„Ég held að heildarmynd á söluferlið og fylgni við lög og reglur muni ekki fást fyrr en að þeirri athugun lokinni,“ segir ríkisendurskoðandi.
Sendi nektarmyndir af dreng sem hann passaði
Dæla, kæla og verja mikilvæg mannvirki
Ekki hægt að slá gosið út af borðinu strax
Vinna hefst í dag við að reisa undirstöður
Formaðurinn útilokar ekki undirritun í kvöld
Þrír menn ruddust inn í íbúð í Vesturbænum
Kæling hraunsins þykir skila góðum árangri