Allmargar netárásir á RÚV á hverjum degi

Allmargar netárásir eru gerðar á vef Ríkisútvarpsins á hverjum einasta degi en stofnunin hefur ágætan viðbúnað til að bregðast við þeim.

Þetta sagði Stefán Eiríksson útvarpsstjóri í Morgunútvarpinu á Rás 2 í morgun.

Hann sagði RÚV hafa unnið að því hörðum höndum í eitt og hálft ár að takast á við „þessa nýju ógn sem að okkur steðjar“ og bætti við að fjölmiðlar gegndu lykilhlutverki í samfélaginu. Það væri grafalvarlegt þegar stór vefur á borð mbl.is yrði fyrir netárás í margar klukkustundir, óháð ástæðunni þar á bak við.

Frétt af mbl.is

Vefur mbl.is lá niðri vegna netárásar

Stefán sagði þetta þýða auknar kröfur til fjölmiðla hvað þetta varðar og að þeir þyrftu að bregðast við stöðunni með stuðningi stjórnvalda.

Benti hann á að í netárásum væri farið á fjölsótta vefi og í langflestum tilfellum gengju þær út á að ná í peninga.

Fjölmiðlar ekki hluti af grunninnviðum

Sveinn Guðmarsson, upplýsingafulltrúi utanríkisráðuneytisins, sagði að samkvæmt núgildandi regluverki væru ákveðnir grunninnviðir skilgreindir sem stjórnvöld beindu sjónum sínum reglulega að, þar á meðal orkuinnviðir, fjarskipti og heilbrigðiskrefið. Hingað til hefðu fjölmiðlar ekki talist til þessara grunninnviða.

Sveinn sagði netárásina sem var gerð á Fréttablaðið hafa vakið athygli utanríkisráðuneytisins, án þess að hún hefði kallað á sérstök viðbrögð þaðan.

Frétt af mbl.is

Netárás og hótun um að loka vef Fréttablaðsins

Hann tók fram að utanríkisráðuneytið væri ekki með forræði yfir netöryggismálum á Íslandi en að það færi með varnarmál og hefði yfirsýn yfir ógnir sem steðja að Íslandi og eiga upptök sín í alþjóðlegu umhverfi.

„Ráðuneytið fylgist grannt með þessum málum almennt,“ sagði hann um netárásirnar. 

• Blogga um frétt