Innlent | mbl | 8.12.2022 | 21:27

Vill lækka skuldir ríkisins um 20 milljarða

Þorbjörg Sigríður Gunnlaugsdóttir, þingmaður Viðreisnar. mbl.is/Hákon

Viðreisn leggur til þær breytingartillögur á fjárlagafrumvarpi fyrir 2023; að skuldir ríkisins verða lækkaðar um 20 milljarðar, hagræðing í ríkisrekstri sem skili þremur milljörðum, auka framlög til barnafjölskyldna um 7,5 milljarðar, fjárfesta í heilbrigðiskerfinu fyrir sex milljarða, hækka veiðigjöld um sex milljarða og leggja á kolefnisgjöld á mengandi iðnað sem skili 13,5 milljörðum í ríkiskassann.

Þorbjörg Sigríður Gunnlaugsdóttir, þingmaður Viðreisnar, greindi frá þessum tillögum á þingi í dag.

Flokkurinn telur brýnt að takast á við hallarekstur ríkisins, þar sem hann hvetur til þenslu og verðbólgu sem leggst þungt á almenning.

Mikilvægt sé að styðja Seðlabankann í því markmiði að hemja verðbólgu og sýna aðhald í fjármálum ríkisins. Flokkurinn vill leggja 7,5 milljarða í það að hækka barnabætur, vaxtabætur og húsnæðisbætur.

Vaxtakostnaður of hár

Flokkurinn vill að strax á næsta ári verði skuldir ríkisins lækkaðar um 20 milljarðar. Það gangi ekki að vaxtagjöld séu þriðji stærsti fjárlagaliður ríkisins, þar sem hár vaxtakostnaður veikir getu ríkisins til þess að fjárfesta í grunnþjónustu fyrir almenning til framtíðar.

Viðreisn vill að það verði eftirsóknarvert að vinna í heilbrigðiskerfinu og vill bæta kjör kvennastétta í heilbrigðiskerfinu og að sex milljörðum verði aukalega varið í heilbrigðiskerfið.

Telja frumvarpið vanmeta verðmæti Íslandsbanka

Flokkurinn vill einnig hækka veiðigjöld um sex milljarð og kolefnisgjöld verða lögð á stóriðju, sem hingað til hefur verið undaþegin slíkum gjöldum. Flokkurinn telur að það skili ríkisjóð tekjum upp á 13,5 milljarða

Viðreisn vill klára selja eignarhlut ríkisins í Íslandsbanka á næsta ári og að söluandvirði hans verði varið til niðurgreiðslu skulda. Flokkurinn telur að fjárlagafrumvarpið vanmeti verðmæti eignarhluta ríkisins um 13 milljarða, miðað við eiginfjárstöðu bankans.