Anton Guðjónsson
Svanhildur Ólöf Þórsteinsdóttir, varaformaður VR, segist ánægð með kjarasamning sem undirritaður var í dag, þó í upphafi hafi verið leitast eftir meiru. Samningurinn er stuttur og því verður strax farið í að undirbúa atlögu að næsta samningi.
„Eins og þetta blasir við mér þá er ég mjög ánægð með þessa samninga og ég tel þetta vera hið besta mál núna í aðdraganda jóla. Þetta er stuttur samningur og við förum strax að undirbúa atlögu að næsta samningi,“ segir Svanhildur í samtali við mbl.is.
„Auðvitað hefði maður alveg viljað meira en ég held að þetta sé alveg ágætis niðurstaða, við gerum bara enn betur næst.“
Svanhildur segir að í raun hafi VR ekki fengið það sem þau leituðust eftir í upphafi.
„Maður fær kannski ekki það sem maður leggur upp með en það er mæst á leiðinni, þannig eru samningaviðræður. Það þarf alltaf að gera einhverjar málamiðlanir,“ segir Svanhildur.
„Mér finnst fólk vera mjög ánægt með þessa niðurstöðu. Ég hef fulla trú á því að þessu samningur verði samþykktur af félagsfólki okkar.“