Jólahús við Austurveg á Selfossi

Fá hús á landinu eru jafn fallega skreytt fyrir jólin og Austurvegur 29 á Selfossi. Þar hafa hjónin Gísli Þór Guðmundsson og Sólveig Ósk Hallgrímsdóttir búið síðan um aldamót og önnur jólin sín í húsinu settu þau þar á fallegar ljósaskreytingar. Slíkt hafa þau gert æ síðan svo skemmtileg hefð hefur myndast.

Sólveig Ósk fyrir utan húsið fallega, þar sem allt er skreytt. mbl.is/Óttar

Seríur, kransar og krónur með hvítum og rauðum lit prýða húsið sem stendur við fjölfarna aðalgötu bæjarins. Skreytingar eru við glugga, á svölum og í þakskeggi og einnig á grenitrjám framan við húsið. Kransar eru víða á veggjum hússins og ljósaslör hangir úr þakskegginu.