„Nokkur hópur farþega er í flugstöðinni, ríflega þúsund manns,“ segir Guðjón Helgason, upplýsingafulltrúi Isavia, af gangi mála í Flugstöð Leifs Eiríkssonar en eins og mbl.is hefur greint frá hafa flugfélögin Icelandair og Play aflýst öllum sínum flugferðum í dag vegna illviðris og fannfergis sem sett hafa mark sitt á samgöngur landsmanna.

Frétt af mbl.is

Fjöldahjálparstöð opnuð í Reykjanesbæ

Kveður Guðjón gesti stöðvarinnar hvort tveggja farþega á leið út sem lent hafi í aflýstu flugi og farþega sem komu til landsins í morgun og komast nú hvorki lönd né strönd vegna ófærðar á Reykjanesbraut.

Reynt að gera líðan fólks sem bærilegasta

„Starfsfólk okkar og annarra rekstraraðila í flugstöðinni er að hjálpa fólkinu og láta því líða sem best í flugstöðinni á meðan þetta er staðan. Boðið er upp á vatn og verið að sækja teppi fyrir þá farþega sem þess þurfa,“ segir Guðjón enn fremur.

Frétt af mbl.is

Play og Icelandair aflýsa öllu flugi í dag

Segir hann vonir standa til þess að farþegar sem það vilji komist úr stöðinni fljótlega hvort sem það yrði til að komast í fjöldahjálparstöðina í Reykjanesbæ eða aðra áfangastaði. „En það er sýnist mér búið að aflýsa komum og brottförum í dag,“ segir upplýsingafulltrúinn að lokum.

Tengdar fréttir

Frost á Fróni

Kaldasti vetur aldarinnar

• Viðvaranir gætu verið í gildi fram á miðvikudag
• Snjólögin veik um þessar mundir
• Snjóflóð fallið og varað við frekari hættu
• Óvenju löng kuldatíð í Skagafirði

» Fleiri tengdar fréttir

• Blogga um frétt