Strandaglópar á leið í loftið til Reykjavíkur

„Eins og staðan er núna erum við búin að setja upp tvö flug sem fara núna um hádegisbilið með farþega frá Keflavík til Reykjavíkur,“ segir Ásdís Ýr Pétursdóttir, upplýsingafulltrúi Icelandair, í samtali við mbl.is og kveður þar um að ræða farþega sem komu frá Bandaríkjunum í morgun, eitthvað nálægt 500 manns en fyrir hafi líklega um 200 verið fastir í flugstöðinni.

Frétt af mbl.is

Reykjanesbraut er enn lokuð

„Þetta er 757-vél sem við notum í þetta og hún tekur 183 í sæti og við reiknum með að fjölga ferðum ef þörf krefur,“ heldur Ásdís Ýr áfram og segir ferðirnar nýttar vel, á leið til baka frá Reykjavík komi starfsfólk Icelandair með vélunum auk matar. Gert sé ráð fyrir komutíma til Reykjavíkur klukkan 12:20 í fyrstu ferðinni.

„Nú er enn þá óvissa með opnun Reykjanesbrautarinnar svo við ákváðum að grípa til þessa ráðs, gengið hefur erfiðlega að koma starfsfólki í flugstöðina og það skapaði vandræði í gær,“ segir hún að lokum.

• Blogga um frétt