Þórdís: Hörmuleg tíðindi og til skammar

Þórdís Kolbrún Reykfjörð Gylfadóttir utanríkisráðherra segir að henni blöskri ákvörðun talíbana að banna konum að stunda nám í háskólum í Afganistan. 

Þetta kemur fram í færslu sem Þórdís Kolbrún birti á Twitter í kvöld, þar sem hún lýsir því einnig yfir að þetta séu hörmuleg tíðindi.

Talíbanar í landinu greindu frá því í kvöld að nú mættu konur ekki lengur stunda háskólanám. Þetta kom fram í bréfi sem ráðherra æðri menntunar sendi frá sér. Þá segir ráðherrann að ákvörðunin gildi þar til annað verður ákveðið. 

Fram kemur í erlendum fjölmiðlum að búist sé við því að þetta muni taka gildi þegar í stað. 

Þetta takmarkar enn frekar aðgengi kvenna að formlegri menntun, þar sem nú þegar er búið að meina flestum konum að stunda nám á framhaldsstigi. 

Þórdís Kolbrún segir í færslunni að þessi ákvörðun brjóti gegn rétti stúlkna og kvenna til að sækja sér menntun og sé enn ein skammarleg aðgerð talíbana sem beinist gegn afgönsku þjóðinni. 

• Blogga um frétt