Óvenju erfiðir dagar á spítalanum
Veronika Steinunn Magnúsdóttir
Setja bókamerki
Metfjöldi var lagður inn á Landspítala á öðrum degi jóla, alls 47 manns en 40 biðu innlagnar morguninn eftir þar sem þeir komust ekki í rúm á deildum. Álag er mikið á spítalanum um þessar mundir vegna ýmissa veirusýkinga, svo sem inflúensu, RS-veiru og Covid-19.
„Þetta hafa verið óvenjulega erfiðir dagar um jólin og síðustu daga. Álagið á bráðamóttökunni hefur verið mikið og við höfum verið að bregðast við því innanhúss með ýmsum úrræðum,“ segir Runólfur Pálsson, forstjóri Landspítala.
Hlutfall innlagna af bráðamóttöku á legudeildir Landspítala er yfirleitt í kringum 15% en á annan í jólum var hlutfallið 31%.
Ný legudeild sett á fót
Gripið hefur verið til þess að setja á fót nýja legudeild til þess að fjölga bráðalegurýmum, svo hægt sé að mæta þeim mikla fjölda fólks sem leitar á spítalann.
„Að hluta til stafar það af því að úrræði í þjónustu við aldraða hér á höfuðborgarsvæðinu eru ófullnægjandi. Á hverjum tíma vistast á Landspítala til lengri tíma fjöldi aldraðra einstaklinga sem eru bíða eftir öðrum úrræðum,“ segir Runólfur. Plássleysi á Landspítalanum er ekki nýtt af nálinni og eru vonir bundnar um að nýr Landspítali á Hringbraut muni létta undir.
Legurýmin fullnýtt og enn skortur á starfsfólki
„Skortur á legurými á Landspítala er vel þekkt vandamál sem hefur takmarkað okkar svigrúm til að mæta auknu álagi og þess vegna veldur það miklum erfiðleikum þegar svona aðstæður skapast. Af þeim sökum höfum við brugðist við með því að fjölga legurýmum tímabundið,“ segir Runólfur og bætir við að það sé ekki auðvelt því spítalinn glími einnig við manneklu, sérstaklega í röðum hjúkrunarfræðinga.
Heilbrigðisráðuneytið fundaði í gær með fulltrúum Landspítala og helstu aðilum sem veita heilbrigðisþjónustu á höfuðborgarsvæðinu og á heilbrigðisstofnunum í Kraganum vegna álags á bráðaþjónustu þessa dagana.
„Með samráði við heilbrigðisyfirvöld er unnið að viðbrögðum við þessum vanda sem miða að því að skapa aukin úrræði fyrir aldraða sem hafa misst færni og þurfa að vistast á stofnun. Það skapar okkur á Landspítala fleiri opin legurými.“Nýting legurýma sé um 100% og því ærið verk fyrir höndum.
„Það er færni og útsjónarsemi starfsfólksins sem skipt hefur sköpum.“
Samfélagið búi líklega yfir minna ónæmi
Fjöldi veirusýkinga herjar á þjóðina um þessar mundir, sem veldur álagi á bráðamóttökunni eins og fyrr segir. Blanda af sýkingum veldur álaginu, þar á meðal sýkingar í öndunarfærum, RS-veira og Covid-19.
/frimg/1/35/4/1350480.jpg)
„Við óttuðumst að ýmsar veirusýkingar, einkum inflúensu, kynnu að verða meira áberandi í ár. Það bar minna á þessum sýkingum undanfarin ár á meðan heimsfaraldur Covid-19 geisaði svo samfélagið býr líklega yfir minna ónæmi. Þá er hætt við að dreifingin verði meiri í samfélaginu og skapar það hættu á að þessar sýkingar berist í viðkvæma hópa fólks sem hefur tilhneigingu til að veikjast illa.“
Í lokin segir Runólfur að hann bindi vonir um að viðbrögð spítalans við aukinni ásókn þangað muni skila sér.
„Það þarf að leysa legurýmisvanda spítalans til frambúðar. Það tekur tíma en heilbrigðisráðuneytið er að vinna að því að skapa tímabundin úrræði fyrir aldraða sem eru að bíða eftir hjúkrunarrými. Að hluta til hefur það þegar haft jákvæð áhrif þótt það dugi ekki til. En það verður unnið markvisst að þessu áfram.“
Mjög dýrt að tryggja landamærin
Par flutt á bráðamóttöku eftir árás
Vonast eftir breiðri þverpólitískri sátt
Óvissustigi á Vestfjörðum aflýst
Viðreisn gæti valið stjórn
Umræðan var óþægileg fyrir Þórð og flokkinn allan
„Það er sárt að svona fór“
