Skotsvæði á Álfsnesi lokað

Úrskurðarnefnd umhverfis- og auðlindamála hefur fellt úr gildi ákvörðun Heilbrigðiseftirlitsins í Reykjavík frá júlí á síðasta ári um að gefa út starfsleyfi til Skotveiðifélags Reykjavíkur og nágrennis (Skotreyn) til rekstur skotvallar á Álfsnesi við Kollafjörð.

Úrskurðarnefndin hefur áður fellt úr gildi starfsleyfi fyrir umrætt skotæfingasvæði í september árið 2021 eftir að íbúar og landeigendur í nágrenni kærðu leyfisveitinguna. Var leyfið þá fellt úr gildi á þeim forsendum að starfsemin samræmdist ekki aðalskipulagi Reykja­víkur 2010-2030. 

Ákvörðun kærð aftur

Í júlí á síðasta ári samþykkti heilbrigðiseftirlitið að veita Skotreyn starfsleyfi með gildistíma til 31. októ­ber 2026. Var leyfið þá háð sértækum starfsleyfisskilyrðum fyrir starfsemi skotvallarins auk almennra starfsleyfis­skilyrða fyrir mengandi starfsemi. 

Leyfið var veitt eftir að búið var að framkvæma hljóðmælingar og aðrar athuganir á svæðinu og sýndu niðurstöður að  hávaði og önn­ur sú rösk­un sem af starf­inu gæti leitt væri und­ir viðmiðun­ar­mörk­um. 

Frétt af mbl.is

Skotvöllur í Álfsnesi fær nú nýtt starfsleyfi

Ákvörðun heilbrigðiseftirlitsins var kærð á nýjan leik af landeigendum og íbúum á Álfsnesi í ágúst.  Jafn­­framt var þess krafist að hávaðamælingar heilbrigðiseftirlitsins sem fram komu í starfs­leyfinu yrðu ógildar og hljóðmælingar gerðar af óháðum aðila.

Landnotkun ekki breytt

Í niðurstöðu úrskurðarnefndar umhverfis- og auðlindamála frá föstudeginum 30. desember kemur fram að ekki liggi fyrir að landnotkun hafi verið breytt frá því að úrskurður nefndarinnar var kveðinn upp síðast.

Þá fari starfsleyfið auk þess í bága við ákvæði skipulagsreglugerðar um landnotkunarflokka en í þeirri reglugerð er ekki að finna heimild til að víkja frá gildandi landnotkun samkvæmt skipulagi. Með vísan til þess verði því að fella hið kærða starfsleyfi úr gildi.

• Blogga um frétt