Spá 80% fjölgun gesta með skemmtiferðaskipum
Setja bókamerki
Gera má ráð fyrir um helmingi fleiri komum skemmtiferðaskipa í íslenskar hafnir á þessu ári heldur en í fyrra og að farþegum fjölgi um allt að 80% og verði rúmlega 800 þúsund á árinu.
Það stefnir því í afgerandi metár í þessari tegund ferðaþjónustu, að því er kemur fram í nýrri greiningu Ferðamálastofu.
Upplýsinga var aflað hjá sex þeirra hafna sem eru stærstar í komum skemmtiferðaskipa. Þær tóku á móti um um 92% farþegafjölda slíkra skipa síðasta árið fyrir Covid, þ.e. 2019.
Áætlað er að komur skemmtiferðaskipa í þessar sex hafnir verði 1.026 talsins á þessu ári, en þær voru 678 í fyrra og 679 árið 2020.
Samkvæmt greiningunni er áformað að farþegar verði 812 þúsund, en af þeim komi 300 þúsund til Reykjavíkur og um 250 þúsund til Akureyrar, Grímseyjar eða Hríseyjar. Var fjöldi gesta í fyrra 448 þúsund og 511 þúsund árið 2020.
„Sé litið nokkur ár aftur í tímann, eða til ársins 2017, má glögglega sjá hversu mikill vöxturinn hefur verið. Þannig gerir áætlun yfirstandandi árs ráð fyrir 115% fjölgun skráðra farþega og 103% fleiri skipakomum en árið 2017. Meðalstærð skemmtiferðaskipa sem hingað koma hefur einnig verið að aukast," segir í tilkynningu.
Hafnirnar sex gera ráð fyrir beinum tekjum upp á tæpa 2,4 milljarða á árinu. Áætlaður tekjuvöxtur milli áranna 2022 og 2023 er 42% . Engar óbeinar tekjur eða tekjur annarra aðila innanlands eru inni í þessum tölum, svo sem tekjur veitingastaða og ferðaþjónustufyrirtækja.
Upptökur með leynd færast í vöxt
Allt frá nokkrum tímum upp í viku í nýrri miðstöð
Par flutt á bráðamóttöku eftir árás
Mjög dýrt að tryggja landamærin
Hálfgerð martröð fyrir kosningastjóra