Kaldar kveðjur og litlar þakkir

„Heimsfaraldur kórónuveiru sýndi mikilvægi bæði starfseminnar og starfsfólksins. Það er mikill skortur á starfsfólki í þessum geira . Fólk er að kjósa að fara til annarra starfa og þetta hjálpar síður en svo þeirri þróun.

Fólk upplifir þessa orðræðu sem kaldar kveðjur og litlar þakkir fyrir það sem það lagði á sig til að vinna gegn faraldrinum. Þetta fólk hélt að við værum öll að vinna saman á þessum álagstíma,“ segir Sonja Ýr Þorbergsdóttir, formaður BSRB, í kjölfar ummæla Svanhildar Hólm Valsdóttur, framkvæmdastjóra Viðskiptaráðs, sem bar á borð meðalheildarlaun íslenskra hjúkrunarfræðinga, lækna, ljósmæðra og sjúkraliða í Silfri Egils í Ríkissjónvarpinu í gær.

Svanhildur spurði sig hvenær laun þessara stétta væru orðin nógu góð?

Grunnlaun segja aðra sögu

Sonja segir að meðaltal heildarlauna segi ekkert til um föst laun starfsfólks.

„Fólk ber gjarnan svona tölur saman við það sem það þekkir til í dagvinnulaunum. Vaktavinnufólk vinnur á kvöldin og um helgar. Vaktavinnufólk vinnur á rauðum dögum, eins og um jól og á páskum. Það hefur verið mikil mannekla og aukið álag vegna heimsfaraldurs kórónaveiru og fólk hefur unnið mikla yfirvinnu.

Ef við horfum svo til grunnlauna sem er algengast að fólk sé að bera saman milli stétta þá eru byrjunarlaun sjúkraliða á Landspítalanum 448.025 kr og byrjunarlaunin hjá hjúkrunarfræðingum á sömu stofnun eru um 525.000 kr.“

Frétt af mbl.is

„Hún spyr hvað er nóg, þetta er ekki nóg“

Sonja segir tímabundnar álagsgreiðslur hafa verið til þessa hóps en að mati BSRB dugi þær ekki til að greiða fyrir það aukaálag sem skapast þegar bæði skortir starfsfólk og sinna þurfi fleiri verkefnum.

„Þessi umræða vaknar gjarnan í tengslum við gerð kjarasamninga. Þarna er undir rós verið að halda því fram að launin séu há. Það fer ekki vel í fólk sem er á lægri launum en stéttir sem sinna sambærilegum störfum þegar kemur að hæfnikröfum, ábyrgð og álagi. Fólk upplifir þetta sem kaldar kveðjur.“

• Blogga um frétt