Um 150 manns leita Modestas í dag

Umfangsmikil leit að Modestas Antanavicius, 46 ára karlmanni sem ekkert hefur spurst til síðan laugardaginn 7. janúar, hefur haldið áfram í dag og eru nú um 150 manns að leita.

„Það er leitað á sjó og landi með drónum og öllum þeim björgum sem við höfum,“ segir Einar Jóel Ingólfsson, formaður svæðisstjórnar hjá Slysavarnarfélaginu Landsbjörg, í samtali við mbl.is.

Leitað er á mjög stóru svæði í kringum Borgarfjörð og Borgarnes, að sögn Einars. „Það er leitað alls staðar og reynt að komast til botns í þessu máli.“

Frétt af mbl.is

Biðja fólk að skoða garða og geymslur

Björgunarsveitarmenn leita Modestas við Borgarnes. mbl.is/Theodór Kr. Þórðarson

Fólk skoði sumarbústaði sína

Hann segir fáar ábendingar hafa borist og er síðast vitað um ferðir Modestas klukkan 17 á laugardaginn fyrir viku á Olís í Borgarnesi, en hann er búsettur í bænum.

Þá hafa upptökur úr eftirlitsmyndavélum ekki veitt frekari vísbendingar.

Frétt af mbl.is

Leitarsvæðið nær langleiðina að Hreðavatni

Bæjarbúar hafa verið beðnir um að skoða nærumhverfi sitt, auk þess að sumarbústaðaeigendur skoði sína bústaði í kringum Borgarnes. „Það mun hjálpa okkur alveg helling ef fólk gerir það,“ segir Einar.

Segir hann að leitað verði fram eftir degi á meðan það er bjart. „Við leitum á meðan birta er og við tökum stöðuna eftir daginn hvernig framhaldið verður.“

• Blogga um frétt