Innlent | mbl | 9.2.2023 | 21:55

Fagnar sakfellingunni en er ósátt við stjórnvöld

Sema Erla Serdar. Ljósmynd/Aðsend

Sema Erla Serdar fagnar því að Héraðsdómur Reykjavíkur hafi sakfellt Margréti Friðriksdóttur, sem heldur úti Fréttin.is, fyrir að hafa hótað sér lífláti. Hún er þó ósátt við málsmeðferð stjórnvalda í málinu.

„Þetta er ekki bara sigur fyrir mig heldur er það líka sigur fyrir samfélagið þegar ofbeldisfólk er dæmt fyrir gjörðir sínar,“ skrifar Sema Erla á Facebook-síðu sína.

Greint var frá því í dag að Margrét hafi verið dæmd í 30 daga skilorðsbundið fangelsi fyrir að hafa hótað Semu lífláti.

Frétt af mbl.is

Margrét sakfelld fyrir að hóta Semu Erlu lífláti

Í ágúst árið 2018 fór ég til lögreglunnar til þess að kæra konu fyrir hótanir, líkamsárás og hatursglæp eftir að hún...
Posted by Sema Erla Serdar on Fimmtudagur, 9. febrúar 2023

Ólíðandi að ofbeldismál séu árum saman í kerfinu

Sema telur málsmeðferð stjórnvalda í málinu ekki til fyrirmyndar.

Sema kærði Margréti til lögreglunnar í ágúst árið 2018. Nú tæpum fimm árum síðar er kominn dómur.

„Það er ólíðandi að ofbeldismál séu árum saman í kerfinu. Það er fóður fyrir frekara áreiti og ofbeldi þegar gerandi er ekki boðaður í skýrslutöku hjá lögreglu í næstum eitt og hálft ár. Að það gleymist að bjóða brotaþola að leggja fram bótakröfu (ekki í fyrsta skipti). Dómskerfi sem þvingar þolendur til þess að mæta gerendum sínum í dómssal og sæta frekara áreiti,“ skrifar Sema.