Innlent | mbl | 13.2.2023 | 16:00 | Uppfært 17:51

Getum lifað fimmtudag og föstudag

Frá olíubirgðastöðinni í Örfirisey. Ljósmynd/Aðsend

„Það er auðvitað ljóst að áhrifin verða veruleg og víðtæk, sérstaklega á stórhöfuðborgarsvæðinu.“

Þetta segir Frosti Ólafsson, framkvæmdastjóri Olís, um mögulegar afleiðingar verkfalls vörubifreiðastjóra sem starfa undir kjarasamningum Eflingar við Samtök atvinnulífsins.

Ótímabundin vinnustöðvun vörubifreiðastjóra hefst klukkan 12 á hádegi næstkomandi miðvikudag.

Frétt af mbl.is

Bílstjórar og hótelstarfsmenn í verkfall

Olíufélögin Olís og N1 hafa í samstarfi við Olíudreifingu kortlagt þau áhrif sem yfirvofandi verkfall olíuflutningabílstjóra gæti haft á starfsemi félaganna og eldsneytisbirgðir í landinu og gerð hefur verið áætlun um mótvægisaðgerðir eins og hægt er.

Hörður Gunnarsson framkvæmdastjóri Olíudreifingar segir að fyllt verði á allar afgreiðslustöðvar, sem ekki verður hægt að flytja eldsneyti til, meðan á verkfalli stendur.

Frétt af mbl.is

Olíubílstjórar undirbúa kröfugerð

Frosti Ólafsson, framkvæmdastjóri Olís. Ljósmynd/Aðsend

Frosti segir að þeim dreifingarbifreiðum sem verði til staðar verði forgangsraðað og þá muni félögin halda uppi upplýsingagjöf gagnvart viðskiptavinum sínum um stöðu mála.

Hörður segir nægan mannafla til að bregðast við forgangsmálum. Verkfallsnefnd Eflingar þurfi að veita undanþágur þegar það á við.

„Ég á ekki von á öðru en að undanþágur fáist til heilbrigðisstétta og lögreglu til dæmis.“

Snertir verkfallið eingöngu hagsmuni einstaklinga og fyrirtækja á stórhöfuðborgarsvæðinu?

Hörður segir áhrif verkfalls ná út fyrir stórhöfuðborgarsvæðið.

„Starfsemin ætti að vera eðlileg á Snæfellsnesi og svona um það bil frá Blönduósi austur á Langanes og þaðan suður með og alveg að Kirkjubæjarklaustri,“ segir hann.

Hörður Gunnarsson.

Hörður segir að afgreiðslustöðvar olíufélaganna hafi um þriggja sólarhringa birgðir en ekki ætti að koma til skorts á gasolíu sem flutt er með skipum.