Landspítali hefur rætt við Eflingu um undanþágu

Landspítali hyggst biðja um undanþágu til þess að tryggja það að aðfangakeðja spítalans verði óskert þrátt fyrir verkfall bílstjóra sem fyrirhugað er að hefjist klukkan 12 á morgun að óbreyttu. 

Snýr undanþágubeiðnin því um að fyrirtæki sem sjá um að koma með aðföng á spítalann fái undanþágu. 

Treysta á þjónustu birgja 

„Landspítali treystir á þjónustu ýmissa birgja þegar kemur að mikilvægum aðföngum. Dæmi um þetta eru lyf, lækningatæki, súrefni, matvæli og fleira sem nauðsynlegt er fyrir þjónustu við sjúklinga.

Ljóst er að röskun á þjónustu birgja við Landspítala getur ógnað öryggi sjúklinga og getur haft veruleg neikvæð áhrif á starfsemina. Aðfangakeðjur Landspítala eru hluti af lífæðum spítalans sem ekki mega stöðvast,“ segir í skriflegu svari spítalans við fyrirspurn mbl.is 

Hyggst senda formlega beiðni 

Landspítali hefur þess vegna átt í samskiptum við Eflingu í því skyni að afla upplýsinga um mögulegar undanþágur frá fyrirhuguðu verkfalli. Spítalinn hyggst senda inn formlega beiðni til undanþágunefndar Eflingar þess efnis.

Stjórnendur Landspítala treysta á gott samstarf við forystu Eflingar um úrlausn þessara verkefna,“ segir ennfremur í svari spítalans. 

• Blogga um frétt