Bjóða upp á meistaranám í afbrotafræði

Boðið verður upp á meistaranám í afbrotafræði við Háskóla Íslands frá og með komandi haustmisseri. Boðið er upp á námið í samstarfi við stofnanir innan íslenska réttarkerfisins. Þetta kemur fram í tilkynningu frá skólanum.

„Afbrotafræðin sem sjálfstæð fræðigrein í háskólum hefur vaxið mjög á undanförnum áratugum í öðrum ríkjum. Þá hafa afbrotafræðinámskeið við HÍ notið mikilla vinsælda og almennt mikilvægi afbrotafræðinnar aukist,“ er haft eftir Margréti Valdimarsdóttur, dósent í félags- og afbrotafræði, í tilkynningu.

Margrét hefur unnið að undirbúningi námsleiðarinnar. Ljósmynd/Aðsend

Geta valið milli tveggja kjörsviða

Margrét hefur unnið að undirbúningi námsleiðarinnar ásamt hópi samstarfsfólks innan félagsfræðinnar. Auk hennar koma meðal annars prófessorarnir Helgi Gunnlaugsson, Jón Gunnar Bernburg og Þóroddur Bjarnason að skipulagningu og kennslu í náminu. Þá verða sérfræðingar frá lögreglunni á höfuðborgarsvæðinu og ríkislögreglustjóra einnig meðal kennara á námsleiðinni.

Í náminu stendur val nemenda á milli tveggja kjörsviða, rannsóknartengdrar afbrotafræði og hagnýtrar afbrotafræði. Þá mun nemendum gefast færi til starfsþjálfunar.

„Rannsóknartengda námslínan mun nýtast fólki sem hefur áhuga á að starfa við rannsóknir, hvort sem það er við greiningu gagna fyrir stofnanir í réttarkerfinu eða við fræðilegar rannsóknir, og verður frábær grunnur að doktorsnámi í afbrotafræði við erlenda háskóla.

Hagnýta leiðin mun nýtast fólki sem hefur áhuga á að starfa við löggæslu eða í öðrum störfum innan réttarvörslukerfisins, félagsþjónustunnar eða hjá öðrum stofnunum þar sem þekking og skilningur á samfélaginu er mikilvæg,“ segir í tilkynningunni.

• Blogga um frétt