Laminn og skilinn eftir nakinn við Elliðavatn

Héraðssaksóknari hefur gefið út ákæru á hendur þremur mönnum fyrir líkamsárás, frelsissviptingu og ólögmæta nauðung miðvikudaginn 11. september 2019.

Er mönnunum gert að sök að hafa svipt mann frelsi sínu í að minnsta kosti 25 mínútur eftir að hann settist inn í aftursæti bifreiðar við Árbæjarsafn.

Stuttu eftir að maðurinn settist inn í bifreiðina, sem einn hinna ákærðu keyrði, hafi hinir tveir komið í aftursætið eftir að hafa upprunalega falið sig í skotti bílsins.

Sleginn með stálkylfu í bústað við Elliðavatn

Hótuðu þeir manninum með piparúða að halda kyrru fyrir í bílnum, og var honum ekið í sumarbústað við sunnanvert Elliðavatn. Veittust hinir ákærðu að manninum, úðuðu piparúða í augu hans og „slógu hann víðs vegar um líkamann með stálkylfu“, segir í ákærunni.

Hinir ákærðu hafi í kjölfarið neytt manninn til þess að afklæðast og fara ofan í Elliðavatn, ella yrði hann fyrir frekari barsmíðum, og skilið hann þar eftir kaldan og blautan.

Maðurinn hafi hlotið yfirborðsáverka og marbletti á báðum handleggjum, vinstri öxl, vinstri fótlegg og á baki, marbletti á andliti og höfði og yfirborðsáverka á augnsvæði.

Þá er krafist af hálfu brotaþola að hinir ákærðu verði dæmdir til að greiða honum rúmar tvær milljónir króna auk vaxta.

• Blogga um frétt