Öllum reglum fylgt eftir við meðhöndlun kókaínsins
Setja bókamerki
Hollenska lögreglan segir að öllum reglum og verkferlum hafi verið fylgt eftir er hún meðhöndlaði tæplega 100 kíló sendingu af kókaíni sem átti að smygla til Íslands síðasta sumar.
Fjórir Hollendingar báru vitni í stóra kókaínmálinu fyrir Héraðsdómi Reykjavíkur í dag. Erfiðlega hafði tekist að skipuleggja vitnaleiðslurnar yfir Hollendingunum, en tæplega sjö vikur eru síðan aðalmeðferð í málinu hófst. Fjölmiðlar biðu vitnaleiðslnanna í dag átekta í ljósi banns dómara í málinu um að greina frá því sem kom fram í skýrslutökunum fyrr en þeim var öllum lokið.
Hollendingarnir báru vitni í gegnum fjarfundabúnað og greindu frá ferlinu frá því að fíkniefnin voru haldlögð þar til þeim var eytt.
Sakborningarnir fjórir í málinu; Páll Jónsson, Daði Björnsson, Jóhannes Páll Durr og Birgir Halldórsson, hafa gagnrýnt hvernig staðið var að vigtun og sýnatöku efnanna.
Hollenska lögreglan haldlagði 99,25 kíló af kókaín og var einungis 10% af efninu tekið til skoðunar.
Sakborningarnir bera því fyrir sér að um ófullnægjandi rannsókn hafi verið að ræða og gerðu athugasemd við að enginn fulltrúi lögreglunnar á Íslandi eða verjandi ákærðu hafi verið viðstaddur rannsókn á efnunum.
Ekki gerlegt að taka sýni úr öllum pökkum
Hollendingarnir lýstu því fyrir dómi að ef umfang fíkniefnanna mældist undir 300 kílóum væri það regla í Hollandi, við meðhöndlun slíkra sendinga, að sýni væru tekin úr 10%. Hollenskur saksóknari sem fór fyrir rannsókninni sagði að sú regla væri eftir evrópskum stöðlum og hefði verið í gildi eins lengi og hún hefði gegnt því embætti.
Því voru tekin sýni úr tíu pökkum og tveir pakkar umfram það valdir til þess að spreyja yfir sérstöku spreyi sem litar efnin ef þau reynast vera fíkniefni, sem þau vissulega voru. Allar pakkningarnar voru valdar af handahófi.
Annar aðili sem sá um að uppfylla réttarbeiðni frá Íslandi sagði að ekki væri gerlegt að taka sýni úr öllum pökkum þeirra sendinga sem hollenska lögreglan haldleggur þar sem umfangið sé svo mikið. Allir fjórir Hollendingarnir sögðu að öllum reglum og verkferlum varðandi þessa sendingu hafi verið fylgt eftir og að ferlið hafi verið það sama og við meðhöndlun allra annarra fíkniefnasendinga.
Í hollensku hafnarborgunum Rotterdam og Vlissingen lagði lögreglan hald á 52,5 tonn af efninu á síðasta ári. Holland er í þriðja sæti á eftir Belgíu og Spáni yfir þau Evrópulönd sem glæpahópar mest til að koma fíkniefnum inn í álfuna.
Efnin brennd eins fljótt og hægt er
Hollenski saksóknarinn sagði að fíkniefnin væru brennd eins fljótt og hægt væri til þess að koma í veg fyrir að þeim verði stolið og þau komist aftur í umferð. Sýnin væru geymd ef þess væri óskað, en aldrei sendingin í heild sinni.
Páll Jónsson hefur setið í einangrun frá því að hann var handtekinn 4. ágúst og sagði í skýrslutöku fyrir dómi að einangrunin hafi tekið gríðarlega á hann.
Honum hafi verið greint frá því að einangrunin væri á grundvelli almannahagsmuna sem Páll sagðist ekki skilja þar sem búið væri að eyða fíkniefnunum og engin ógn stafaði af honum.
Hámarksrefsing fyrir fíkniefnainnflutning er tólf ára fangelsi, en ofan á það gætu bæst dómar fyrir peningaþvætti. Því er ljóst að ef mennirnir verða fundnir sekir gætu þeir átt yfir höfði sér langa fangelsisvist.
Á miðvikudag er gert ráð fyrir málflutningi saksóknara og verjanda í málinu og þá má búast við dómsuppkvaðningu um fjórum vikum síðar.
Hagsmunir íbúa að leiðarljósi
Skoða hvort Hvalur 8 og 9 geti hitað upp Suðurnes
Sleginn yfir grófri framkomu gegn fjölskyldunni
Komið „meira púður“ í viðræðurnar
Ránið var framið í strætóskýli
Munu áfrýja beint til Hæstaréttar
„Allt í rusli“ við brúargerð á Vestfjörðum
