Í dag lýkur skýrslutökum fyrir Héraðsdómi Reykjavíkur í stóra kókaínmálinu svokallaða. Í lok dags mega fjölmiðlar því birta fréttir af því sem fór fram er sakborningarnir fjórir, sem taldir eru hafa reynt að smygla tæplega 100 kg af kókaíni til landsins, báru vitni 19. janúar.
Dómari bannaði fjölmiðlum við upphaf aðalmeðferðar að greina frá því sem kæmi fram í skýrslutökunum fyrr en þeim yrði að fullu lokið.
Í dag verða teknar skýrslur af fjórum hollenskum lögreglumönnum í gegnum fjarfundarbúnað, en lögreglan þar í landi lagði hald á kókaínið sem var flutt með timbursendingu frá Brasilíu.
Páll Jónsson, Daði Björnsson, Jóhannes Páll Durr og Birgir Halldórsson eru ákærður fyrir skipulagða brotastarfsemi, tilraun til stórfellds fíkniefnalagabrots og hafa haft umtalsverðar óútskýrðar tekjur sem talið er að þeir hafi aflað sem ávinnings af refsiverðum brotum. Eru upphæðirnar frá 13 og upp í 17 milljónir á hvern einstakling, samtals 63 milljónir.
Hámarksrefsing fyrir fíkniefnainnflutning er tólf ára fangelsi, en ofan á það gætu bæst dómar fyrir peningaþvætti. Því er ljóst að ef mennirnir verða fundnir sekir gætu þeir átt yfir höfði sér langa fangelsisvist.