Hafa staðið á móti straumnum

„Reynslan hefur sýnt að sífellt er verið að bæta við kaupaukum í ýmsu formi til stjórnenda án þess að það komi niður á háum föstum launum.“

Þetta segir Árni Guðmundsson, framkvæmdastjóri Gildis lífeyrissjóðs, í innsendri grein í Innherja á Vísi.

Launakjör forstjóra skráðra félaga hér á landi hafa verið nokkuð í umræðunni en öll eiga þau sameiginlegt að vera að nokkrum eða stórum hluta í eigu íslenskra lífeyrissjóða eins og Árni bendir á.

Upphæðir úr takti við það sem eðlilegt getur talist

Árni tekur í umfjöllun sinni meðal annars dæmi um launakjör forstjóra Skeljar sem vöktu athygli á dögunum.

Hann gerir fyrirvara í umfjöllun sinni um að forstjórar fyrirtækja sinni flóknum og krefjandi verkefnum og eðlilegt sé að launakjör þeirra taki mið af því en segir umræddar upphæðir hins vegar úr takti við það sem eðlilegt getur talist í íslensku samfélagi.

„Enda hefur Gildi síðustu ár beitt sér gegn þeirri þróun í launakjörum sem við sjáum nú raungerast. Sú vinna byggir á hluthafastefnu sjóðsins þar sem tekin er einörð afstaða í þessum málum, en þar segir meðal annars:

„Ef félög ákveða að notast við árangurstengd launakerfi er rétt að föst laun séu að sama skapi lægri, samanborið við félög þar sem slík árangurstengd kerfi eru ekki til staðar,“ skrifar Árni og heldur áfram.

Ítrekað beitt sér gegn þróuninni

„Gildi hefur ítrekað beitt sér í samræmi við þessa stefnu síðustu ár. Í fyrra greiddu fulltrúar sjóðsins til að mynda atkvæði gegn starfskjarastefnu Arion á ársfundi bankans. Stefnan var engu að síður samþykkt.

Gildi greiddi atkvæði gegn tillögum um breytingar á starfskjarastefnu og kaupréttaráætlun á aðalfundi Skeljungs 10. mars 2022 (nafni félagsins var breytt í Skel á sama fundi).

Gildi sat hjá þegar tillaga um starfskjarastefnu Kviku banka var samþykkt á aðalfundi félagsins 31. mars 2022 og greiddi atkvæði gegn starfskjarastefnu Marel á aðalfundi 16. mars 2022 sem og tillögu um hlutabréfatengt hvatakerfi.

Þá greiddi Gildi atkvæði gegn tillögu um starfskjarastefnu sem innihélt kaupaukakerfi á aðalfundi Icelandair 3. mars 2022.“

Lagt mikið í sem litlu hefur skilað

Í niðurlagi greinar sinnar ræðir Árni þá staðreynd að Gildi hafi oftast einn fjárfesta á markaði staðið á móti straumnum hvað þessar starfskjarastefnur varðar.

Hann segir mikla vinna hafa verið lagða í greinargerðir og rökstuðning fyrir afstöðu sjóðsins.

„Því miður hefur niðurstaðan oftast verið sú að starfskjarastefnurnar eru samþykktar, sem að lokum leiðir til launa- og bónusgreiðslna eins og rakið hefur verið hér að framan.“

• Blogga um frétt