Þátttaka Daða hluti af sjálfskaðandi hegðun
Setja bókamerki
Verjandi eins sakbornings í stóra kókaín málinu sagði að skjólstæðingur hans hafi verið í neyslu fíkniefna um nokkurra hríð og að einstaklingar í þeirri stöðu upplifi að þeir hafi litlu að tapa. Því hafi þátttaka sakborningsins í að taka á móti 100 kílóum af kókaíni síðasta sumar hafa verið hluta af sjálfskaðandi hegðun.
Daði Björnsson er þrítugur Reykvíkingur sem tók á móti fíkniefnunum sem komu frá Brasilíu og voru falin í trjádrumbum.
Arnar Kormákur Friðriksson, verjandi Daða, krafðist vægustu refsingar sem lög leyfa fyrir skjólstæðing sinn í málflutningi sínum fyrir Héraðsdómi Reykjavíkur í dag.
Héraðssaksóknari leggur til að sakborningarnir hljóti hámarksrefsingu í héraðsdómi, auk þess að þeir greiði allan sakarkostnaðar.
Alvarlegar athugasemdir við ákæru
Arnar sagði Daða hafa viljað koma hreint fram og játa sök, en það væri ekki hægt í ljósi þess hvernig ákæran er lögð fram. Arnar gerir alvarlegar athugasemdir við ákæru saksóknara.
Daði er ákærður fyrir skipulagða brotastarfsemi, tilraun til stórfellds fíkniefnalagabrots og hafa haft umtalsverðar óútskýrðar tekjur sem talið er að þeir hafi aflað sem ávinnings af refsiverðum brotum. Þá er hann einnig ákærður fyrir að hafa í vörslu sinni maríjúana.
Hálfgert eyland
Arnar sagði aðkomu Daða vera afmarkaða og skipulagning innflutningsins lokið er Daði kom að málinu, og brotið þar af þegar leiðandi framið.
Daði lýsti því fyrir dómi í janúar að hann hafi komist í kynni við mann sem fékk hann í verkið, sem Daði hélt að ætti að klárast fljótt en það dróst á langinn. Hann fjarlægði efnin úr trjádrumbunum, pakkaði fíkniefnunum niður og flutti til ótilgreinds aðila til að hægt yrði að koma efnunum í sölu og dreifingu.
Daði sagði að hann hafi fundið fyrir miklum þrýstingi frá þessum ónefnda aðila og fundist hann vera fastur. Hann sagði samskiptin hafa valdið honum mikilli streitu.
Arnar nefndi að Daði skipulagði ekki neitt heldur fylgdi einungis fyrirmælum. Hann hafi ekki haft neina vitneskju um kaup eða sölu. Hann sagði Daða því vera hálfgert eyland í málinu. Daða hafi fundist það bæði pínlegt og vandræðalegt að hann skyldi hafa tekið þátt í þessu smygli fyrir litla upphæð.
Arnar sagði þátttöku Daða tilviljanakennda og benti á að enginn tengsl séu á milli hans og hinna sakborninganna.
Verjandinn sagði einnig að óútskýrðar tekjur, um 16 milljónir króna, Daða tengist að engu leyti málinu að öðru leyti en pening sem hann fékk til leigu á húsnæðinu sem fíkniefnin voru geymd í.
Eðlileg refsing þrjú ár í fangelsi
Arnar nefndi að Daði hafi hreinan sakaferil og verið samvinnuþýður í rannsókn lögreglu. Þá telur hann eðlilegt að taka tillit til hegðunar Daða undanfarið en hann hefur lagt stund á nám og verið virkur í meðferðarstarfi á Litla-Hrauni.
Arnar lagði áherslu á að hlutur Daða væri mun veigaminni en hluta höfuðpauranna sem skipulögðu smyglið, og því væri eðlileg refsing fyrir brot Daða um þriggja ára fangelsisvist.
Önnur aurskriða við Eyrarhlíð
Telja sig geta rekið Grindavík til 2026
Vandræði með vatn í Bolungarvík
Skoða hvort Hvalur 8 og 9 geti hitað upp Suðurnes
„Einhverjir töfrar sem gerast“
Nokkrar skriður féllu á Vestfjörðum
