Íslensk erfðagreining hafði betur gegn Persónuvernd

Úrskurður Persónuverndar, um að Íslensk erfðagreining hafi brotið á persónuverndarlögum í þremur málum sem vörðuðu notkun blóðsýna Covid-19-sjúklinga, var ógiltur fyrir dómi í dag.

Íslensk erfðagreining stefndi Persónuvernd og Landspítalanum í nóvember á síðasta ári, vegna úrskurðar Persónuverndar í þremur málum sem vörðuðu skimanir og öflun samþykkis á notkun blóðsýna til vísindarannsókna.

Fyrirtækið taldi niðurstöðu Persónuverndar ranga og líta fram hjá því að fyrirtækið hafi verið að vinna fyrir sóttvarnalækni og Landspítalann.

Frétt af mbl.is

Persónuverndarlög brotin í rannsókn á Covid-19

Höfuðstöðvar Íslenskrar erfðagreiningar. Ljósmynd/Aðsend

Persónuvernd hafi litið fram hjá samfélagsaðstæðum

Persónuvernd komst að þeirri niðurstöðu í málinu í nóvember á síðasta ári að Íslensk erfðagreining og Landspítalinn hefðu brotið persónuverndarlög þegar blóðsýni úr sjúklingum með Covid-19 á Landspítala hefðu verið send til rannsókna hjá ÍE án leyfis vísindasiðanefndar. Umrædd sýni voru tekin 3.-7. apríl 2020, en vísindasiðanefnd samþykkti rannsóknina 7. apríl.

ÍE bendir á að fyrirtækið hafi verið að vinna fyrir sóttvarnalækni og stjórnvöld við alvarlegt hættuástand í samfélaginu og segir Persónuvernd með öllu hafa litið fram hjá samfélagsaðstæðum í úrskurði sínum.

Einnig taldi ÍE að úrskurður persónuverndar hefði beinst að röngum aðila þar sem blóðsýnin voru tekin af Landspítalanum í samráði við sóttvarnalækni í þeim tilgangi að nýta þau til vísindarannsókna, ekki ÍE.

Frétt af mbl.is

Persónuvernd sendi Kára ábendingu

Gert að greiða 2 milljónir í málskostnað

Í samtali við mbl.is í dag sagði Ingvi Snær Einarsson, lögmaður hjá ríkislögmanni, lítið geta tjáð sig um málið að svo stöddu, enda dómurinn nýuppkveðin. Hann kvaðst sjá fram á að fara yfir dómsúrskurðinn og ákveða næstu skref í samráði við Persónuvernd.

Var Persónuvernd og Landspítala gert að greiða Íslenskri erfðagreiningu tvær milljónir í málskostnað. 

• Blogga um frétt