Búast má við því að líf og fjör verði í miðborg Reykjavíkur síðdegis og í kvöld á degi heilags Patreks. Síðustu ár hefur færst í vöxt að fólk hér geri sér glaðan dag á þjóðhátíðardegi Íra og þá eru þarlendir drykkir vinsælir, til að mynda írskt viskí og kokteilar.

Græni liturinn er jafnan áberandi á þessum hátíðarhöldum og því er viðeigandi að nýr tilraunabjór frá Borg brugghúsi verði reiddur fram á fjölda bara og öldurhúsa í dag. Sá kallast Á grænni grein og er einmitt grænn að lit.