Á leið í endurhæfingu heima á Íslandi

Jóhannes Hrefnu­son Karls­son sem legið hefur á In­ova Fairfax-sjúkra­hús­inu í Virg­in­íu í Banda­ríkj­un­um eftir að hafa fengið streptó­kokka­sýk­ingu í heil­ann í febrúar síðastliðinn, hefur verið útskrifaður úr endurhæfingu ytra og er á leiðinni heim.

Frétt af mbl.is

Veiktist alvarlega vegna streptókokka í heila

„Við verðum í loftinu á leiðinni heim til Íslands á meðan vatnapólóið stendur yfir í Laugardalslaug í kvöld,“ segir Hrefna Guðmundsdóttir, móðir Jóhannesar í samtali við mbl.is.

Félagar í sundknattleiksdeild Ármanns blása til sundknattleiksgleði í Laugardalslaug til styrktar Jóhannesi klukkan 20:30 í kvöld.

Frétt af mbl.is

„Engin spurning að reyna að hjálpa“

Sýnir góðar framfarir

Hrefna segir í samtali við mbl.is að Jóhannesi miði vel og sýni mjög góðar framfarir. Hún segir að hann sé farinn að tala meira og meira með hverjum deginum en að hann eigi enn talsvert í land og fari í talþjálfun þegar þar að kemur.

Þá segir hún að nú muni meðal annars reyna á það hversu langt hann er kominn í að ganga á ný en eðli málsins samkvæmt hefur hann ekki gengið lengra í einu en út spítalaganginn til þessa.

Jóhannes þurfti að gangast undir heilaskönnun til að ganga úr skugga um að sýklalyf væru farin að virka með réttum hætti og þegar grænt ljós fékkst úr þeirri rannsókn var hann útskrifaður.

Jóhannes og Hrefna, móðir hans á Fairfax-sjúkrahúsinu, augnabliki fyrir útskrift. Ljósmynd/Hrefna Guðmundsdóttir

Fundið fyrir einstökum stuðningi

Hrefna segist vera mjög bjartsýn með framhaldið.

„Þetta er ungur maður. Hann fer í endurhæfingu heima á Íslandi og eftir þrjá til sex mánuði kemur í ljós hvaða bata hann hefur náð en við erum mjög bjartsýn.“

Hrefna segir að Jóhannes og aðstandendur hans hafi fundið fyrir einstökum stuðningi vina og ættingja.

„Það sem maður hefur líka upplifað hér í Bandaríkjunum er ótrúleg hjálpsemi og elskusemi fólks sem hefur enga hagsmuni í að hjálpa okkur. Það er einstakt starfsfólk í heilbrigðiskerfinu hérna og einstök fagmennska. Við erum orðlaus yfir hversu vel öllu hefur verið sinnt og komum heim með þakklæti og góða minningar.“

Alþjóðlegi hamingjudagurinn í dag

Hrefna, sem er sérfræðingur í hamingjufræðum, bend­ir á að í dag sé alþjóðlegi ham­ingju­dag­ur­inn og að þemað frá Sam­einuðu þjóðunum fyr­ir dag­inn sé „get social“.

„Það er akkúrat það sem við höf­um upp­lifað svo sterkt. Hvað fólk er gott og er til­búið að gera extra. Við förum heim með barminn fullan af þakklæti,“ segir Hrefna Guðmundsdóttir, móðir Jóhannesar, í samtali við mbl.is.

Vilji les­end­ur leggja lóð sitt á vog­ar­skál­ar Jó­hann­es­ar og fjöl­skylu þeirra fylgja hér bankaupp­lýs­ing­ar söfn­un­ar­reikn­ings­ins fyr­ir Jó­hann­es.

Banki: 0370-26-040837

Kennitala: 170773-3579

Styrkt­arsíða fyr­ir Jó­hann­es

• Blogga um frétt