Yfir 500 farþegar fastir á Seyðisfirði

Til Seyðisfjarðar komu í morgun með Norrænu yfir 500 farþegar á um það bil 80 bílum með það fyrir augum að ferðast um landið næstu daga.

Fólkið er þó fast á Seyðisfirði en Fjarðarheiði er lokuð vegna óveðurs. Jens Olsen Hilmarsson, yfirverkstjóri Vegagerðarinnar á Egilsstöðum segir í samtali við mbl.is að það standi til að reyna að koma þeim yfir með fylgdarakstri.

Frétt af mbl.is

Farið suður fyrir þéttbýlið

Með tvo plóga yfir heiðina

„Við leggjum af stað frá Egilsstöðum klukkan fimm síðdegis í dag og förum með tvo plóga yfir Fjarðarheiði og ryðjum eins vel og við getum á leiðinni á Seyðisfjörð. Svo tökum við bílana yfir í nokkrum hollum þannig að um 20 bílar verða fyrir aftan hvorn plóginn fyrir sig og hugmyndin er að reyna að ná þeim yfir í þremur til fjórum hollum,“ segir Jens.

Jens á von á því að aðgerðinni verði lokið um áttaleytið í kvöld ef vel tekst til.

„Það er kolvitlaust veður á Fjarðarheiðinni og mjög blint á fjórum til fimm erfiðum stöðum á leiðinni. Þetta er eini möguleikinn til að koma fólkinu yfir í dag að því að við teljum.

Fjarðarheiði er lokuð og verður lokuð á meðan á aðgerðunum stendur,“ segir hann.

Jens segir aðra fjallvegi vera opna í nágrenninu og að það hafi verið opið norður í allan dag.

„Það lokast í kvöld auðvitað, fljótlega eftir að við hættum að þjónusta.“

Í góðu yfirlæti

Rúnar Gunnarsson, yfirhafnarvörður á Seyðisfirði, segir í samtalið við mbl.is, fólkið vera í góðu yfirlæti í skipinu og í ferjuhúsinu.

„Við erum með móttökusal sem tekur þrjú- til fjögurhundruð manns. Það eru einhverjir sem eru á húsbílum sem ætla að fara og stinga sér í samband við rafmagn og svoleiðis. Það fer ekkert illa um fólkið,“ segir Rúnar.

„Við erum að vonast til þess að þeir sem þurfa að komast í burtu komist á eftir í fylgd Vegagerðarinnar. Annars er það bara í fyrramálið,“ segir Rúnar.

• Blogga um frétt