Snjóflóðin í Neskaupstað í morgun féllu úr að minnsta kosti þremur giljum fyrir ofan byggðina.
Snjóflóð úr Miðstrandarskarði og/eða Klofagili féll skammt innan þéttbýlisins. Þar rann flóðið meðfram leiðigarði og út í sjó, að því er Veðurstofa Íslands greinir frá.
Þá féll snjóflóð úr Nesgili, utarlega í bænum, á nokkur íbúðarhús við göturnar Starmýri og Hrafnsmýri. Fólk sem var statt í þessum húsum bjargaðist án alvarlegra meiðsla.
Snjóflóð úr Bakkagili, sem er næsta gil utan við Nesgil, stöðvaðist skammt ofan byggðarinnar við Gauksmýri.
Eftir að flóðin féllu voru mörg hús rýmd undir Nes- og Bakkagiljum, og einnig atvinnuhúsnæði á snjóflóðahættusvæðum innan þéttbýlisins. Í öryggisskyni voru jafnframt öll hús í efstu húsaröðum undir varnargörðum í Neskaupstað rýmd. Það er jafnan gert í alvarlegum snjóflóðahrinum þar sem varnargarðar hafa verið reistir.
Hús voru einnig rýmd á Seyðisfirði en engar fréttir hafa borist af snjóflóðum þaðan.
Spáð er minnkandi úrkomu í dag og norðaustanátt og ætti að vera orðið úrkomulaust í kvöld. Óvíst er á þessu stigi hversu lengi rýmingin verður í gildi.
„Ekki hefur sést til hlíðarinnar milli flóðanna en líklegt er að einhver flóð hafi einnig fallið þar. Stoðvirki hafa verið reist í hluta upptakasvæða í Tröllagiljum og Drangagili, en flóð kunna að hafa fallið í hlíðinni neðan stoðvirkjanna og í giljunum sjálfum þar sem ekki eru stoðvirki,“ segir í tilkynningunni.
„Á næstu dögum verða ummerki snjóflóða í hlíðinni könnuð til þess að afla upplýsinga um snjóflóð sem kunna að hafa fallið ofan varnargarða og kanna aðstæður í upptaksvæðum hlíðarinnar. Einnig verða könnuð ummerki snjóflóðsins sem leiðigarður innan við þéttbýlið beindi til sjávar til þess að athuga hversu hátt það rann upp á garðinn,“ segir þar einnig.
Varnarvirki hafa verið reist í Neskaupstað fyrir byggðina neðan hættulegustu snjóflóðafarvega hlíðarinnar, þ.e. neðan Tröllagilja og Drangagils, og einnig neðan Urðarbotns sem er þar á milli.
Einnig hafa varnarvirki verið hönnuð fyrir byggðina undir Nesgili og Bakkagili, þar sem snjóflóðin féllu nú, og verða þau reist á næstu árum.
Undir Nesgili og Bakkagili stendur byggðin fjær fjallinu en innar í bænum. Þar þurfa því stærri flóð að falla til að skapa hættu í byggðinni heldur en áður en varnarvirki voru reist ofan þeirra svæða.