Arnar Þór nýr framkvæmdastjóri SÍS

Arnar Þór Sævarsson hefur verið ráðinn framkvæmdastjóri Sambands íslenskra sveitarfélaga. En hann hefur frá árinu 2018 starfað sem aðstoðarmaður Ásmundar Einars Daðasonar, fyrst fyrir hann sem félags- og barnamálaráðherra og frá árinu 2021 sem aðstoðarmaður mennta- og barnamálaráðherra.

Í tilkynningu frá Sambandinu kemur fram að Arnar hafi sem aðstoðarmaður ráðherra meðal annars komið að að margvíslegri stefnumótun, t.d. á ráðuneytunum, framhaldsskólum og verknámi á Íslandi, stefnumótun á sviði húsnæðismarkaðar, almannatrygginga, vinnumarkaða, málefnum barna og að gerð Lífskjarasamnings á vinnumarkaði 2019-2022. Arnar Þór er formaður stýrihóps stjórnvalda um byggingu þjóðarleikvanga.

Þar áður starfaði Arnar Þór sem bæjarstjóri Blönduósbæjar frá árunum 2007-2018, þar kom hann m.a. að byggingu sundlaugar, stofnun Textílseturs Íslands, stofnun Þekkingarsetursins á Blönduósi og undirbúningi og uppbyggingu gagnavers á Blönduósi. Hann starfaði sem lögfræðingur hjá Símanum á árunum 2002-2006 og sem lögfræðingur hjá Fjármálaeftirlitinu á árunum 1999-2001.  Arnar Þór er með Cand.Jur frá Háskóla Íslands og réttindi til starfa sem héraðsdómslögmaður og með próf í verðbréfaviðskiptum. Arnar Þór er giftur Gerðu Betu Jóhannsdóttur hjúkrunarfræðingi og eiga þau þrjú börn. Hann mun hefja störf hjá Sambandi íslenskra sveitarfélaga í maí.

Um miðjan síðasta mánuð greindi blaðamaður Morgunblaðsins, Andrés Magnússon, frá því að samkvæmt heimildum væri auðséð að ráða ætti Arnar í stöðuna og að óánægja væri hjá Sjálfstæðismönnum innan Sambandsins varðandi aðferðina við ráðninguna, en fyrirsögn fréttarinnar var Hrossakaup í Sambandi sveitarfélaga.

Arnar tekur við af Karli Björnssyni, sem mun láta af störfum fyrir aldurs sakir eftir 15 ára starf hjá sambandinu.

• Blogga um frétt