„Hafnarvörðurinn hringdi nú bara í persónulega símann minn og lét mig vita að það væri rostungur á bryggjunni,“ segir Aron Björn Guðmundsson, lögregluvarðstjóri á Þórshöfn, um óvæntan páskagest sem birtist bæjarbúum og gestkomandi vegfarendum þar í morgun.

Frétt af mbl.is

Gestkvæmt á Þórshöfn

„Ég fór þá bara og lokaði bryggjunni af og tilkynnti héraðsdýralækni svo um rostunginn,“ heldur varðstjórinn áfram. Hann segir hefðbundið verklag að tilkynna Matvælastofnun um viðburði á borð við þennan en kveðst ekki hafa haft erindi sem erfiði við að ná sambandi við stofnunina um páskahátíðina miðja.

Vígtennurnar, höfuðútlitseinkenni þessara dýra, eru oft nálægt 50 sentimetrum að lengd en hafa þó mælst heill metri í sumum dýrum. Ljósmynd/Jón Gunnar Geirdal

Aron er einn á vaktinni en segir þau stundum tvö saman, „og svo erum við með góðan héra líka“, bætir hann við, en svo kallast héraðslögreglumenn í daglegu tali, það er afleysingamenn lögreglu sem ráðnir eru samkvæmt heimild í lögreglulögum til aukastarfa við löggæslu er þörf krefur.

Aron segir verkefni lögreglunnar á Þórshöfn hin fjölbreyttustu svo sem ráða má af komu rostungsins í morgun. Hann bíður þess nú að heyra meira af skipan mála vegna heimsóknarinnar, „en ég vona nú bara að hann fari aftur í sjóinn“, segir varðstjórinn og bætir því við að forvitnilegt væri að vita hvort þarna sé um sama dýr að ræða og sást á Breiðdalsvík í febrúar.

Frétt af mbl.is

Rostungur í makindum á Breiðdalsvík

Hér má sjá nærumhverfi rostungsins þar sem hann liggur á flotbryggjunni. mbl.is/Líney Sigurðardóttir

Tengdar fréttir

Krúttleg dýr

Flækingshundar auka áhuga á pýramídum

• Krúttlegasta netstjarnan fær eigið lag
• Krúttlegustu verur veraldar eignuðust þríbura
• Ótrúlegur ferðalangur vekur heimsathygli
• „Það var ekki mikið verið að gelta“

» Fleiri tengdar fréttir

• Blogga um frétt