Sjáðu nýjar höfuðstöðvar Landsbankans

Í nýjum höfuðstöðvum Landsbankans við Austurbakka sem telja um 10 þúsund fermetra, eru einkaskrifstofur hvergi að finna. Byggingin er opin, vinnurýmin fjölbreytt og dagsbirtan lýsir upp húsið í gegnum stóra þakglugga og glugga á útveggjum.

Húsið var tekið í gagnið undir lok síðasta mánaðar þegar fyrsti starfsmannahópurinn fluttist til. Áður var gert ráð fyrir að flutningar myndu hefjast í desember á síðasta ári en framkvæmdir hafa þó tafist og eru nú á lokametrunum. Í dag hafa 4. og 5. hæð verið teknar í notkun og 2. og 3. hæð verða tilbúnar á næstu vikum.

Í heildina hafa um 300 starfsmenn flust til frá því í mars og hafa flutningar gengið vel, að sögn Lilju Bjarkar Einarsdóttur bankastjóra. Stefnt er að því að ljúka við flutninga á næstu vikum en alls verða um 600 til 650 starfsmenn þar að störfum.

Frétt af mbl.is

Tekur nokkrar vikur að flytja banka

16.500 fermetrar

Hönnuðir nýju byggingarinnar eru norræna arkitektastofan C. F. Moller og Arkþing Nordic. Verkfræðihönnun var í höndum Eflu verkfræðistofu.

Húsið er um 16.500 fermetrar í heildina auk tæknirýma og bílakjallara sem á að nýtast öllu svæðinu. Þar af nýtir Landsbankinn rúmlega 10 þúsund fermetra undir sína starfsemi en íslenska ríkið á um 6 þúsund fermetra af byggingunni og mun nýta húsnæðið undir starfsemi utanríkisráðuneytisins og Listasafns Íslands.

Frétt af mbl.is

Nýja Landsbankahúsið farið að taka á sig mynd

Stuðlabergið áberandi

Hönnuðir fá innblástur úr íslensku klettalandslagi eins og sjá má á einkennandi klæðningu hússins en það er þakið um 3.300 fermetrum af stuðlabergi úr Hrepphólanámu í Hrunamannahreppi.

Á jarðhæðinni verður tekið á móti viðskiptavinum bankans þar sem þeir geta sótt ráðgjöf og fengið afgreiðslu. Þar verða þó einnig hraðbankar og önnur sjálfsafgreiðslutæki sem verða aðgengileg utan afgreiðslutíma bankans.

Á 2. til 5. hæð bankans verða vinnustöðvar starfsfólks með fram útveggjum. Vinnurýmin eru sameiginleg og eru flestir starfsmenn ekki með fasta vinnuaðstöðu. Í húsinu eru þó mörg lokuð fundarherbergi og næðisrými. Þá er gerður greinarmunur á opnu vinnurými og verkefnamiðuðu vinnurými.

Í meðfylgjandi myndskeiði má sjá nýju höfuðstöðvarnar.

• 1 blogg um fréttina

Bloggað um fréttina

• Örn Gunnlaugsson: Bruðl.