Enn ríkir óvissa um það hvort náist að aflífa fjárstofninn á Syðri-Urriðaá fyrir sauðburð vegna óvissu um förg­un á hræj­un­um. Ef ekki tekst að leysa förgunarmál fyrir lok dags verður aflífun frestað fram á sumar. 

Þetta segir Sig­ur­borg­ Daðadótt­ir, yf­ir­dýra­lækn­ir hjá Mat­væla­stofn­un, í samtali við mbl.is. 

Frétt af mbl.is

„Förgunarmálin þar sem hnífurinn stendur í kúnni“

Riða greindist á bænum á föstudag og þarf því að aflífa rúmlega 700 kindur. 

„Við ætluðum að byrja í dag en við urðum að fresta því af því að förgunarleið er ekki klár. Þannig að við höfum í raun bara morgundaginn upp á að hlaupa. Það þarf bara að finna lausn í dag eða ekki,“ segir hún. 

Sorp­vinnslu­stöðin Kalka er eina stöðin sem sér um förg­un á hræj­um, en hún get­ur ekki tekið við hræj­un­um frá Syðri-Urriðaá vegna bil­un­ar í búnaði. 

Fóstrið drepst eftir blóðtæmingu

Á miðvikudag er sauðburður of nærri til þess að leyfilegt sé að aflífa kindurnar. 

„Það er ekki forsvaranlegt út frá velferð að flytja eða aflífa dýr sem eru svona langt gengin meðgöngu.“

Sigurborg segir að dýr sem séu gengin meira en 90% meðgöngu eigi ekki að flytja. 

Það tekur lengri tíma fyrir fullburða fóstur í móðurkviði að drepast heldur en móðurina. Móðirin er svipt meðvitund með skoti og síðan er hún blóðtæmd og blóðtæmingin og súrefnisleysið veldur því að fóstrið drepst. 

Geta aflífað alla hjörðina á einum degi 

Það er á ábyrgð sveitarfélagsins og Umhverfisstofnunar að leysa förgunarmál. Ef lausn finnst þarf síðan að fá samþykki undanþágu frá umhverfisráðuneytinu. 

Spurð hvort Matvælastofnun hafi burði til að aflífa öll dýrin fyrir lok morgundagsins svarar Sigurborg játandi. 

„Flöskuhálsinn hefur alltaf verið förgunarleiðin. Þess vegna höfum við þurft að taka þetta í áföngum en við getum aflífað á einum degi alla hjörðina.“

Tengdar fréttir

Riðuveiki

Ánægjulegt að þurfa hvorki að nota byssu né hníf

• Munu fagna síðasta niðurskurðinum vegna riðu
• Stefna að riðulausu Íslandi fyrir 2044
• Skrifa undir landsáætlun um útrýmingu riðu
• Yfirdýralæknir tímabundið til ráðuneytisins

» Fleiri tengdar fréttir

• Blogga um frétt