Tveir sinubrunar

Frekar rólegt var hjá slökkviliðinu þennan fyrsta dag sumars en fjögur útköll voru sem öll leystust farsællega að sögn Bjarna Ingimarssonar varðstjóra hjá Slökkviliðinu.

„Það voru tveir sinubrunar, annar í Garðabæ og hinn í Grafarvogi. Það gekk vel að slökkva eldana, og við sendum bara einn bíl í hvort útkall,“ segir Bjarni en segir að ekki sé vitað hvað hafi ollið sinubrunanum.

Farið offari við grillið

Eitt útkall var út af eldi sem kviknaði í grilli í Breiðholti en það gekk bæði fljótt og vel að slökkva eldinn og engar skemmdir urðu.

„Síðan fórum við upp í Hvalfjörð þar sem við sáum reyk, en þar var verið að brenna sorp í tunnu sem ekki á að gera, en í þessu tilfelli var vel frá öllu gengið,“ segir Bjarni og segir að engin hætta hafi verið á ferðum.

• Blogga um frétt